Sport sharhlovchisi Davron Fayziyev bugun bo‘lib o‘tadigan La Liga navbatdagi turidan o‘rin olgan "Espanyol" va "Real" to‘qnashuvi haqida fikr bildirdi.
"Bugun Ispaniyada turnir jadvalining birinchi va oxirgi o‘rinlaridagi klublar to‘qnash kelishadi. Biroq lider jamoani yaqqol favorit deyishga shoshilmay turamiz. Chunki "Espanyol" birgina g‘alaba bilan xavfli zonadan chiqib ketishi mumkin. Kataloniyaliklar o‘zini devorga taqalgan yarador yirtqichdek tutishi mumkin. Bunday vaziyatda raqibga sakrash varianti qoladi, xolos.
"Real"da, aksincha, ishlar maromida. "Barselona" durang o‘ynadi. "Real" bugun yutsa, 3 ochko farq bilan oldinga o‘tib ketadi. Ana shu xotarjamlik Zidan yigitlarini chalg‘itib qo‘ymasa “dushman tarafda”, ya’ni Kataloniya o‘lkasida g‘olib bo‘lib qaytishi mumkin.
"Espanyol" hamshaharlari uchun o‘ynamaydi (avval ham o‘ynamagan), o‘zi uchun o‘ynaydi, chunki ular jar yoqasida. Bugungi sharhlaydigan o‘yinimda boshqa intriga topish qiyin. Barchamiz bilib turibmiz, Real bugun yaqqol favorit", — deya fikr yuritdi Davron Fayziyev.
