Germaniyaning «Shtutgart» klubi hujumchisi Mario Gomes futbolchilik faoliyatini yakunlaganini e’lon qildi.
«Mavsum boshida «Shtutgart»ning Bundesligaga chiqishiga ishonchim komil edi. Bu klub, Germaniya va futbolchi sifatidagi so‘nggi yilim bo‘lishiga qaror qildim», — deydi Gomes.
O‘z navbatida 34 yoshli futbolchiga «Bavariya» va «Shtutgart» klublari uning o‘yinlari uchun minnatdorchilik bildirdi.
Qayd etish joiz, germaniyalik hujumchi «Bavariya»dagi faoliyati bilan mashhurlikka erishgan. Myunxen klubi safida u jami 113 ta gol urgan, uch bor Germaniya chempioni bo‘lgan, 2012/13 yilgi mavsumda Chempionlar Ligasida g‘olib chiqqan.
«Shtutgart» safida esa Gomes 110 marta raqiblar darvozasini ishg‘ol etdi. Shuningdek, u «Fiorentina», «Beshiktosh» va «Volfsburg» jamoalarida ham to‘p surgan.
Germaniya terma jamoasida Mario Gomes 2010 yilgi Jahon Chempionatida bronza medaliga sazovor bo‘lgan.