Filippo Indzagi boshqaruvidagi «Benevento» klubi mavsum tugashiga 7ta tur qolganida A seriya yo‘llanmasini qo‘lga kiritdi.

Jamoa V seriyaning 31-turida «Stabiya» klubi 1:0 hisobida mag‘lub etdi. Shu tariqa, Indzagi shogirdlari Ligada 2 va 3-o‘rinni egallab turgan jamoalardan 24 ochkoga ilgarilab ketishdi. Natijada «Benevento» yuqori divizion yo‘llanmasini qo‘lga kiritdi.

So‘nggi marta «Askoli» klubi 1977/78 yilgi mavsumda mavsum tugashiga 7 tur qolganida A seriya yo‘llanmasiga ega bo‘lgan edi.

«Benevento» esa o‘z tarixida ikkinchi marta yuqori divizionda faoliyat yuritadi. Jamoa ilk marta 2017/18 yilgi mavsumda A seriyada ishtirok etib, bir yilning o‘zida pastga tushib ketgan edi.

«Benevento» joriy mavsumda 23ta g‘alaba, 7ta durang va bitta mag‘lubiyat qayd etdi. Ikkinchi pog‘onani «Krotone» egallab turibdi.

Eslatib o‘tamiz, ushbu jamoa "Bunyodkor" futbolchisi Jasur Jaloliddinovga qiziqish bildirgan edi. 17 yoshli futbolchi dekabr oyida ushbu jamoa safida yig‘inda ishtirok etgan edi.