Kecha O‘zbekiston chempionatining  Pro liga mavsumiga start berildi. Qirgulidagi "Neftchi" SK stadionida bo‘lib o‘tgan 1-tur bahsida "Neftchi" klubi Samarqandning "Dinamo" jamoasini qabul qildi. Shiddatli va keskin kurashlarga boy bo‘lgan o‘yinda farg‘onaliklar 1:0 hisobida g‘alaba qozonib, 3 ochkoni qo‘lga kiritishdi. Uchrashuv yakuniga yetgach, "Neftchi" bosh murabbiyi Abdusamad Do‘rmonov o‘yin borasida o‘z fikrlarini bildirib o‘tdi.

"Mavsumdagi birinchi o‘yin doimo hayajonli bo‘ladi. Har bir jamoa uchrashuvga albatta g‘alaba qozonaman deb keladi. Kimning g‘olib chiqishi esa, jamoalarning puxta tayyorgarlik ko‘rganligi, murabbiylar o‘yinchilarda g‘alabaga bo‘lgan ishonch tuyg‘usi mustahkamlanganligi va bu ishonch futbolchilar tomonidan astoydil bajarilishiga bog‘liq.

Mana bugun yigitlarimizda xohish, shijoat va g‘alaba istagi borligini ko‘rdik. Bugungi o‘yindan qoniqdim. Futbolchilar ishonchni to‘liq oqladi.

Maqsadimiz, har bir uchrashuvda faqat yutuq uchun maydonga tushib, ko‘tarinki kayfiyatni saqlagan holda ko‘zlangan marraga dadil odimlab, eng yuqori o‘rin uchun kurashishdir", — dedi Do‘rmonov.

"Neftchi" matbuot xizmati