Superligasining 8-turidan o‘rin olgan «Nasaf» - «Metallurg» (1:0) uchrashuvidan keyingi matbuot anjumanining ikkinchi qismida jamoamiz  bosh murabbiyi Ro‘ziqul Berdiyev ishtirok etdi.

«O‘ylaymanki, futbolchilarimiz barchani xursand qila oldi. Chunki, oxirgi o‘yinlarda natija qoniqarsiz ko‘rinish olayotgandi. O‘yinga keladigan bo‘lsak, biz nazorat qila oldik va shijoat bilan harakat qildik. "Metallurg" jamoasiga kam imkoniyat berdik. Ular ko‘proq qarshi hujumda o‘ynashga harakat qilishdi. Himoyachilarimiz raqib hujumlarini bartaraf etishni uddasidan chiqishdi. Zaxiradan maydonga tushgan yosh futbolchilarimiz o‘yinni kuchaytirishdi. Bu qaysidir ma’noda g‘alabada bosh omil bo‘ldi.

Dilaver Xaris? Ko‘rgan bo‘lsangiz, avvalgi o‘yinda to‘liq imkoniyat berdik. Hujumchini vazifasi gol urish yoki golli vaziyat yaratish. Shuni hisobga olgan holda bugun boshqa futbolchilarga ishonch bildirdik. Xaris oldin chetda o‘ynamagan, shu bois kirishib ketishi qiyin kechmoqda. Markoda esa bu jarayon yaxshi kechyapti.

Albatta, «Metallurg» biz uchun noqulay raqib. Lekin, tan olish kerak bekobodliklar tajribali jamoa. Tarkibiga nazara soladigan bo‘lsak ismi va familiyasidan ham bilsa bo‘ladi. Jamoada murabbiyning imzosi ko‘rinib turibdi. Yuqori o‘rinlar uchun kurashishga imkoniyati bor jamoa. Shunga qaramay bugungi o‘yin to‘liq ustunligimizda o‘tdi. Ular qarshi hujumda ham deyarli imkoniyat yarata olmadi. O‘zingiz ko‘rayotgan bo‘lsangiz bizga qarshi ko‘p jamoalar himoyaviy uslubni tanlamoqda.

Doniyor Narzullayev «Metallurg»da o‘z o‘rniga ega bo‘ldi. G‘alabaga erishgan o‘yinlarida g‘alabalarga munosib hissa qo‘shmoqda. Gollarga assistentlik qilmoqda.

Albatta, har bir uchrashuvlarda ruhiy jihatdan bosim bilan o‘ynamayapmiz. Buni o‘zingiz ham ko‘rdingiz. O‘tgan o‘yinlarni esdan chiqarishga harakat qilyapmiz. Agarda bizda ruhiyat bilan bog‘liq muammo bo‘lganida bugun oxirigacha kurasha olmagan bo‘lardik, tajribali jamoani yengish oson bo‘lmasdi", — dedi Ro‘ziqul Berdiyev.