Pro-liga 2-turi doirasidagi «Dinamo» - «Istiqlol» (1:2) uchrashuvidan keyin samarqandliklar bosh murabbiyi Ravshan Ahmedov o‘yin borasida to‘xtaldi.
«Ochig‘ini aytsam, bugungi o‘yinimiz menga yoqdi. Chunki, avvalgi o‘yinlarimizga nisbatan yaxshiroq to‘p surdik. Biroq o‘z xatolarimiz evaziga alamli mag‘lubiyatga uchradik. Futbolda bunaqasi uchrab turadi. Hammasini ko‘rdinglar, izohsiz qoldirgan bo‘lardim. Omadsizlik tufayli mag‘lub bo‘ldik. Omad raqib tomonda bo‘ldi.
Shunga qaramay, o‘yinimiz yomon chiqmayotgandi, yigitlarning o‘yinidan qoniqdim. Faqatgina yakuniy zarbalarni beradigan futbolchi topilmadi. Ikkinchi bo‘limda to‘liq ustunlik qildik.
O‘yinimiz chiqmay mag‘lub bo‘lganimizda ham mayli edi, ammo to‘liq ustunlik qilib, vaziyatlar yaratib mag‘lub bo‘lish juda alamli. O‘yin nazorati bizning qo‘limizda edi. Jamoa ko‘rsatgan ko‘rsatmalarni aniq bajardi, bunga e’tirozim yo‘q.
Asosiy tarkibimizdagi Alisher Yusupov va Damir Temirovning maydonga tushmaganiga sabab, ular avvalgi o‘yinda jarohat olishgandi.
Kubok va Pro-ligadagi ketma-ket mag‘lubiyatlar? To‘g‘ri, chempionatdagi ketma-ket ikki uchrashuvda ham ochkolarni yo‘qotdik. Ammo bu hali start, hech narsa yo‘qotilgani yo‘q. Oldindagi o‘yinlar bilan vaziyatni yaxshilashimiz mumkin», - deya fikr bildirdi «Dinamo» bosh murabbiyi Ravshan Ahmedov.
