“Navbahor” klubining tajribali yarim himoyachisi va sardori Azimjon Ahmedov Coca Cola Superliga 9-turidan o‘rin olgan “Navbahor” – “Qizilqum” jamoalari o‘rtasidagi uchrashuvdan oldin o‘z fikrlarini bildirib o‘tdi.

"Ayni paytdagi pandemiya davrida Superliga uchrashuvlari muxlislarsiz o‘tkazilayotgan bo‘lsa-da, o‘yinlar keskin kurashlar ostida kechmoqda. Bunga misol tariqasida ko‘plab bahslarni keltirish mumkin. Jamoamiz ham restartdan keyingi o‘yinlarda ijobiy natijalar qayd etayotgandi. Biroq o‘tgan turda “Bunyodkor”ga imkoniyatni boy berib qo‘ydik.

Shu bois, “Qizilqum”ga qarshi kechadigan bahsga jiddiy tayyorgarlik ko‘rdik. Garchi navoiyliklar turnir jadvalining quyi pog‘onalaridan joy egallab turishgan bo‘lsa-da, har qanday raqibga munosib qarshilik ko‘rsatishlari mumkin. Shuning uchun xotirjamlikka berilish yaramaydi.

Biz har bir o‘yinda maydonga “Navbahor”ning bahslarini oynai jahon orqali tomosha qilib, ishqibozlik qilayotgan muxlislar ruhiy daldasini his qilgan holda, g‘alaba ishtiyoqida tushamiz.

Joriy mavsumda tarkibimizdan yaxshi futbolchilar o‘rin olishgan. Ular bilan birga OCHL yo‘llanmasini qo‘lga kiritishimizga aminman. Jamoamizdagi yigitlarning barchasi o‘z ishini sevadi hamda mehnat qilishdan qochmaydi. Jamoadoshlarim bilan faxrlanaman.

Bo‘lajak o‘yinda ham zafar quchib, jamoamiz ishtirokidagi uchrashuvni televizor orqali tomosha qilib, biz – futbolchilarni ruhan hamda qalban qo‘llab-quvvatlaydigan muxlislarga quvonch ulashish niyatidamiz", — dedi Azimjon Ahmedov.

“Navbahor” PFK matbuot xizmati.