O‘zbekiston terma jamoasi bosh murabbiyi Vadim Abramov Oston O‘runovning «Ufa»dan «Spartak» klubiga o‘tgani borasida o‘z fikrini bildirib o‘tdi.

«O‘runov bilan uning «Spartak» klubiga o‘tishi masalasini muhokama qilmadik. Uning o‘z agentlari bor. O‘zbekiston terma jamoasi o‘yinchisi «Spartak» kabi buyuk jamoa a’zosiga aylangani men uchun yoqimli. Umid qilaman, ushbu transfer futbolchining o‘ziga ham, terma jamoaga ham manfaat keltiradi.

O‘ylashimcha, u «Spartak» safida munosib o‘yin ko‘rsatadi. Shu paytgacha "qizil-oqlar" safida o‘zbekistonlik bir necha nafar futbolchilar to‘p tepishgan. U o‘zbekistonlik futbolchilarning «Spartak»dagi an’anasini davom ettiradi.

Uning qarorini qo‘llab-quvvatlayman. Ehtimol, Oston muntazam o‘yin amaliyotiga bo‘lmasligi mumkin. Lekin uning iqtidori bor va uni «Spartak»da rivojlantira olsa yaxshi bo‘lardi.

Har bir mamlakatning ijobiy va salbiy tomonlari bor. Bu yerda hech qanday murakkab narsa yo‘q. Agar Oston o‘yin amaliyotiga ega bo‘lmasa, O‘zbekiston terma jamoasida uning o‘rnini boshqa futbolchi egallaydi.

Oston bilan to‘qnash kelganmiz. Lekin men uni O‘zbekiston olimpiya terma jamoasi ixtiyoriga qo‘yib yuborgan edim. U bilan hali bamaylixotir gaplashmaganmiz. U terma jamoani Kuper boshqargan paytda o‘ynagan.

O‘runovning insoniy sifatlariga baho bermayman, chunki u bilan yaqindan tanish emasman. O‘yin tomonlama esa O‘zbekistondagi faoliyati orqali kelajagi porloq ekani ko‘rinib turardi. Raqibni yaxshi aldab o‘ta oladi, yoshiga nisbatan jismoniy ko‘rsatkichlari ajoyib. Uning jamoasiga qarshi maydonga chiqqanimizda, u o‘yinni o‘ziga olishi, aldab o‘tishi va zarba bera olishini kuzatganman.

O‘runovning yoshi borasida to‘xtaladigan bo‘lsam, u har bir o‘yinchi uchun alohida ahamiyatga ega. Kimdir kechroq o‘ynab ketadi, kimdir ertaroq. Bu borada oltin oraliq yo‘q. «Spartak»da o‘ynab ketsa, demak, barchasi to‘g‘ri bo‘lgan. O‘ynab keta olmasa, u holda uning «Spartak»ka o‘tishi uchun hali erta ekanini aytgan insonlar haq bo‘lib chiqadi», – dedi Abramov.