Toshkentning "Bunyodkor" klubi Superliganing 10-turida "Metallurg"ga qarshi bahs olib borib, 2:0 hisobida g‘alaba qozondi. Uchrashuvdagi "qaldirg‘ochlar"ning ikki goliga ham yarim himoyachi Nurillo To‘xtasinov mualliflik qildi. O‘yindan keyin Nurillo o‘z fikrlari bilan o‘rtoqlashdi.

– Bu bizning restartdan keyingi ikkinchi o‘yinimiz edi. Sekin asta o‘z formamizga qaytyapmiz. Birinchi bo‘limda o‘ynimiz o‘xshamadi. Ikkinchi bo‘limda esa murabbiyning ko‘rsatmalariga amal qilgan holda maqsadimizga erishdik.

Raqib haqida

– "Metallurg" ham kuchsiz jamoa emasdi. Ayniqsa, bekabodliklar bu mavsum yaxshi o‘yin ko‘rsatishmoqda. Bu o‘yinda birinchi golni urgan jamoa g‘alaba qozonardi va biz buni uddaladik. Bizga g‘alaba juda zarur edi, sababi bir tur avval "Buxoro" bilan durang o‘nagandik.

Jaloliddinovning ketishi

– Albatta, uning ketishi jamoamizga o‘z ta’sirini o‘tkazdi. Chunki u "Bunyodkor"ning asosiy figuralaridan biri edi. Ammo jamoada Jasurning o‘rnini to‘ldira oladigan futbolchilar bor. Uning faoliyatiga omad tilayman.

Jamoaning bu mavsumdagi maqsadi

– "Bunyodkor" doim yuqori o‘rinlar uchun kurashadi. Maqsadimiz kuchli uchlikka kirish.