«Manchester Yunayted» himoyachisi Xarri Maguayr Gresiyada qanday voqea yuz berganini aytib berdi.

«Birinchidan, bizni o‘g‘irlashdi deb o‘yladim. Biz tiz cho‘kdik va qo‘limizni yuqoriga ko‘tardik. Ular esa bizni urishni boshladi. Ular mening oyog‘imga urib, mening futbolchilik faoliyatim yakunlanganini aytishdi. «Endi hech qanday futbol o‘ynamaysan». O‘shanda men bu aniq polisiya emas, deb o‘yladim. Shuning uchun ulardan qochishga harakat qildim. Men shunday sarosima va qo‘rquvda edimki, o‘z hayotim uchun qo‘rqib ketdim», — dedi Maguayr.

Futbolchining aytishicha, mojaro polisiya bo‘limi yaqinida yuz bergan. U o‘zining singlisi Deyzini shifoxonaga olib bormoqchi bo‘lgan edi. Chunki Deyziga ikki erkak kishi yaqinlashganida u hushidan ketishni boshlagan. Maguayr, shuningdek, polisiyaga pora berishga harakat qilganini inkor qilmoqda.

«Bu shunchaki dahshat. Qachondir yana shunday holatga duch kelishni istamasdim. Hech kimga buni ravo ko‘rmayman. Hayotimda ilk marta qamoqxonada o‘tirdim.

Kimdandir kechirim so‘rash kerak, deb o‘ylamayman. Siz qandaydir noto‘g‘ri ish qilsangiz yoki nimadandir afsuslansangiz, kechirim so‘raysiz. Men bunday vaziyatga tushib qolganimdan afsusdaman. Men jahondagi eng katta klubda o‘ynayman va muxlislarni bunday ahvolga solib qo‘yganimdan afsusdaman.

Men Gresiya qonunlariga ishonaman. Takroriy sud bizga tayyorgarlik ko‘rish, dalillarni jamlash va guvohlarni sudga olib kelish uchun ko‘proq vaqt beradi. Haqiqat yuzaga chiqishiga ishonaman», — dedi Maguayr.

Seshanba kuni sud Maguayr, uning akasi Jo va do‘sti Kristofer Shermanni 21 oylik shartli qamoq jazosiga hukm qilgan edi.