«Манчестер Юнайтед» ҳимоячиси Харри Магуайр Грецияда қандай воқеа юз берганини айтиб берди.

«Биринчидан, бизни ўғирлашди деб ўйладим. Биз тиз чўкдик ва қўлимизни юқорига кўтардик. Улар эса бизни уришни бошлади. Улар менинг оёғимга уриб, менинг футболчилик фаолиятим якунланганини айтишди. «Энди ҳеч қандай футбол ўйнамайсан». Ўшанда мен бу аниқ полиция эмас, деб ўйладим. Шунинг учун улардан қочишга ҳаракат қилдим. Мен шундай саросима ва қўрқувда эдимки, ўз ҳаётим учун қўрқиб кетдим», — деди Магуайр.

Футболчининг айтишича, можаро полиция бўлими яқинида юз берган. У ўзининг синглиси Дейзини шифохонага олиб бормоқчи бўлган эди. Чунки Дейзига икки эркак киши яқинлашганида у ҳушидан кетишни бошлаган. Магуайр, шунингдек, полицияга пора беришга ҳаракат қилганини инкор қилмоқда.

«Бу шунчаки даҳшат. Қачондир яна шундай ҳолатга дуч келишни истамасдим. Ҳеч кимга буни раво кўрмайман. Ҳаётимда илк марта қамоқхонада ўтирдим.

Кимдандир кечирим сўраш керак, деб ўйламайман. Сиз қандайдир нотўғри иш қилсангиз ёки нимадандир афсуслансангиз, кечирим сўрайсиз. Мен бундай вазиятга тушиб қолганимдан афсусдаман. Мен жаҳондаги энг катта клубда ўйнайман ва мухлисларни бундай аҳволга солиб қўйганимдан афсусдаман.

Мен Греция қонунларига ишонаман. Такрорий суд бизга тайёргарлик кўриш, далилларни жамлаш ва гувоҳларни судга олиб келиш учун кўпроқ вақт беради. Ҳақиқат юзага чиқишига ишонаман», — деди Магуайр.

Сешанба куни суд Магуайр, унинг акаси Жо ва дўсти Кристофер Шерманни 21 ойлик шартли қамоқ жазосига ҳукм қилган эди.