Milliy olimpiya qo‘mitasi hamda Jismoniy tarbiya va sport vazirligi tomonidan hamkorlikda yo‘lga qo‘yilgan Olimpiya sport turlari bo‘yicha terma jamoalarimizni Xanchjou-2022 Osiyo o‘yinlari va Parij-2024 Olimpiya o‘yinlariga tayyorlash bo‘yicha olib borilayotgan rejalar taqdimoti davom etadi. Bugun O‘zbekiston regbi federasiyasi mazkur musobaqalarga tayyorgarlik bo‘yicha o‘z rejalari bilan o‘rtoqlashdi.

Taqdimotni federasiya vakili Danil Kulikov namoyish qildi va federasiya o‘z oldiga qo‘ygan rejalar haqida batafsil gapirib berdi. Uning ta’kidlashicha, ayni paytda Janubiy Afrika Respublikasidan mutaxassis jalb qilish bo‘yicha muzokara olib borilmoqda va yaqin vaqt ichida terma jamoamizda xorijlik murabbiy faoliyat boshlaydi. Onlayn yig‘ilishda Olimpiya o‘yinlari dasturiga kiritilgan 7x7 regbi yo‘nalishi bo‘yicha terma jamoamizning ayni paytdagi holati, Parij-2024 Olimpiadasiga yo‘llanma olish imkoniyatlari muhokama qilindi. O‘z navbatida federasiya vakillari tomonidan buning uchun MOQ hamda Jismoniy tarbiya va sport vazirligi qaysi yo‘nalishlarda yordam berishlari mumkinligi haqida aytib berishdi.

“Tan olish kerak, bizda jamoaviy o‘yin sport turlari bo‘yicha terma jamoalarimiz vakillarining muntazam shug‘ullanishlari uchun baza yo‘qligi muammo bo‘lib kelgan. Regbi uchun ham Respublikamizda yig‘in tashkil qilish uchun yetarli sharoitga ega joy topsa bo‘ladi. Buning uchun federasiya mutasaddilari o‘zlariga kerakli deb bilgan maydonni tanlashsa, biz Jismoniy tarbiya va sport vazirligi bilan qolgan masalalarda yordam berishga tayyormiz”, – dedi Rustam Shoabdurahmonov.

Yig‘ilish davomida taqdimot bo‘yicha qo‘shimcha savollar, fikr-mulohazalar bildirildi.