AGMK bosh murabbiyi Mirjalol Qosimov "Qizilqum"ga qarshi kechgan o‘yindan keyin quyidagi fikrlarni bildirib o‘tdi.
"Bugun bir-biriga munosib jamoalar to‘qnash keldi. Qaysidir ma’noda derbi bo‘ldi. Kurashlarga boy, jangovor o‘yin kechdi. "Qizilqum" jamoasi ikkinchi davrada yaxshi saviyadagi futbolchilarni safiga qo‘shib oldi. Qolaversa, oxirgi o‘yinlarda yomon natijalar qayd etishmadi. Bugun hech qaysi jamoa mag‘lubiyatga uchragisi kelmadi.
Birinchi bo‘limda o‘zimizning xatomiz evaziga gol o‘tkazib yubordik. Bu esa bizni yanada oldinga borishga majbur qildi. Raqib safidagi Erkin Baydullayevning maydondan chetlatilishi imkoniyatlarimizni oshirdi deyishim mumkin. Haqli ravishda g‘alabani qo‘lga kiritdik. "Qizilqum" jamoasiga keyingi o‘yinlarda omad tilab qolaman", - dedi murabbiy.
