Ushbu ruknimizdagi eng so‘nggi yangiliklar bilan tanishtirishda davom etamiz.
Anchelottig «Chelsi» futbolchisi kerak
Liverpul shahrining «Everton» klubi «Chelsi» himoyachisi Kurt Zuma bilan qiziqib qoldi.
“Le10sport” nashrining ma’lum qilishicha, Karlo Anchelottining shaxsan o‘zi Kurtni jamoaga qo‘shib olishni istamoqda.
Eslatib o‘tamiz, Zuma bu mavsumning ikki uchrashuvida asosiy tarkibda ko‘rinish berdi va o‘z hisobiga bitta gol yozib qo‘ydi.
Kepa norozi
Londonning «Chelsi» jamoasi darvozaboni Kepa Arrisabalaga klubdagi ahvolidan norozi.
"Diario AS" nashrining ma’lum qilishicha, Kepa o‘yin amaliyotiga ega bo‘lmasligi tobora aniq bo‘lib ulgurmoqda. Klubga Mendi kelgach, uning imkoniyatlari yanada kamayib ketdi.
Manbaning ma’lum qilishicha, yosh darvozabon o‘z agentiga Ispaniyada yangi klub izlashi kerakligini ma’lum qilgan.
Tellas seriali davom etadi
Angliyaning «Manchester Yunayted» jamoasi «Portu» himoyachisi Aleks Tellas bilan shartnoma imzolash niyatidan qaytgani yo‘q.
Jurnalist Gonsalo Lopeshning ma’lum qilishicha, «ajdarlar» «qizil iblislar»ning 15 million yevrolik taklifini rad etgan. Jamoa o‘z futbolchisini 25 million yevrodan kamiga qo‘yib yubormoqchi emas.
Manbaning ma’lum qilishicha, ingliz klubi shaxsiy shartnoma borasida braziliyalik futbolchi bilan kelishuvga erishgan.
«RB Leypsig» futbolchisi ortga qaytadi
Germaniyaning «RB Leypsig» klubi futbolchisi Ademola Lukman faoliyatini APLda davom ettirishi mumkin.
“Sky Sport” nashrining ma’lum qilishicha, 22 yoshli futbolchining xizmatlari bilan «Fulhem» klubi jiddiy qiziqib qolgan.
Jamoa yarim himoyachini bir mavsumga ijaraga olishni rejalashtirmoqda.
Eslatib o‘tamiz, Lukman «RB Leypsig» safiga o‘tgan yili 22,5 million yevro evaziga kelib qo‘shilgan.
«Fiorentina» futbolchisi nishonda
Italiyaning «Fiorentina» klubi himoyachisi Igor Julio APL klublari e’tiboriga markaziga tushib qoldi.
“Daily Telegraph" nashrining ma’lum qilishicha, himoyachi bilan “Aston Villa”, «Fulhem», «Lester» va «Lids» klublari qiziqib qolgan.
Eslatib o‘tamiz, Julio 2020 yilning yanvar oyida «Fiorentina» safiga kelib qo‘shilgan.
