Coca Cola Superligasining 19-turida “Metallurg” Namanganda "Navbahor" jamoasi mehmoni bo‘ladi.

Mazkur jamoalar bugungacha kuchlilar safida 47 marta to‘qnash kelishgan. Bugungacha ortda qolgan o‘yinlarning 13 tasida bekobodliklar g‘alaba qozonishgan, yana 13 ta o‘yinda kuchlar teng kelgan. 21 ta o‘yin esa namanganliklarning g‘alabasi bilan intiho topgan. Kiritilgan va o‘tkazib yuborilgan to‘plar nisbatidagi farq namanganliklar foydasiga – 48:68. Mazkur uchrashuvlarda “Navbahor” 76 ochko jamg‘argan bo‘lsa, “Metallurg” 52 ochkoga ega bo‘lgan.

Mazkur klublarning Namanganda o‘tkazilgan bahslarida to‘liq ustunlik vodiyliklar tomonida. Ortda qolgan 23 uchrashuvning faqat bittasida bekobodliklar zafar quchishgan. 5 ta o‘yinda esa tomonlar murosaga kelishgan. 17 o‘yinda esa “Navbahor” g‘alaba nashidasini surgan.

O‘z o‘rnida ushbu o‘yin “Metallurg” uchun kuchlilar safidagi 661-uchrashuv bo‘lishini muxlislarimizga eslatib o‘tmoqchimiz. Bekobodliklar bugungacha mamlakat chempionatlarida 223 bor g‘alaba nashidasini surishgan. 136 o‘yinda esa raqiblari bilan ochkolarni baham ko‘rgan. 301 ta bahs esa “Metallurg”ning mag‘lubiyati bilan yakunlangan. Kiritilgan va o‘tkazib yuborilgan gollar nisbati – 824—1015.