Hujumchi o‘zining O‘zbekiston chempionati yuqori ligasida yubiley golini urishga erishdi.

AGMK darvozasini ishg‘ol qilgan Igor o‘zining Superligada kiritgan to‘plari sonini 100taga yetkazdi. "Paxtakor"ning asosiy tarkibida 2011 yilgi mavsumdan o‘ynashni boshlagan Sergeevga buning uchun 176 bellashuv zarur bo‘ldi. Jamoamiz safida 2011 yil 5 mart kuni "Qizilqum"ga qarshi o‘yinda debyut qilgan Igor ilk golini 2013 yil 3 mart kuni Toshkentda "Navbahor"ga qarshi uchrashuvda urgandi. Shu tariqa hujumchi 2020 yilgi mavsumda yuzlik marrani zabt etdi. Yubiley 50-golini ham u 2016 yil Toshkentda AGMK darvozasiga urgandi.

100 goldan 2tasini xet-trik, 23tasini dubl ko‘rinishida urgan Sergeev qolgan 48 bellashuvda bittadan to‘p kiritgan. 100 golni jami 73 uchrashuvda urgan. Eng ko‘p golni "So‘g‘diyona" darvozasiga urgan - 12ta. "Buxoro"ga 9, "Bunyodkor" va AGMKga 8tadan, "Navbahor", "Metallurg" va "Qo‘qon-1912" darvozalariga 7tadan to‘p kiritishni uddalagan.

Sergeev tez orada "Paxtakor"ning yuqori ligalardagi to‘purariga aylanishi mumkin. Bu borada rekordchi sanalgan Gennadiy Krasniskiy hisobida 102 gol bor. Yana uch gol urgan taqdirda Igor ushbu rekord sohibiga aylanadi.