Bugun Belarus chempionatining joriy mavsumdagi chempionini aniqlab berishi kutilgan uchrashuv bo‘lib o‘tdi. «Shaxtyor» Soligorskda BATEni qabul qildi.

Borisovliklar bahsning 25-daqiqasida Nexaychikning goli evaziga hisobni ochishdi. "Shaxtyor"ning hisobni tenglashtirishga bo‘lgan urinishlari o‘yinning 81-daqiqasiga kelib o‘z samarasini berdi. Belgilangan penaltini Begunov aniq amalga oshirdi.

Uchrashuv so‘ngida g‘alaba to‘pini kiritish uchun Jasur Yaxshiboyevda ikkita imkoniyat bo‘ldi. Dastlab hakam unga nisbatan ishlatilgan qo‘pollik uchun penalti bermagan bo‘lsa, oradan ko‘p o‘tmasdan o‘zbekistonlik futbolchi raqib darvozaboni bilan yakkama-yakka vaziyatda posbonni dog‘da qoldira olmadi.

Ushbu durangdan keyin BATEning ochkolari 54taga "Shaxtyor"niki esa 53taga yetdi. Shu tariqa, mavsum tugashiga 2 tur qolganida chempionlik taqdiri BATEning qo‘lida qolmoqda.

Belarus chempionati, 28-tur. 21:00
Shaxtyor – BATE 1:1 (0:1, 1:0)
Gollar: 0:1 – 25 Nexaychik, 1:1 – 81, penalti Begunov.
Shaxtyor – Gutor, Antich, Xadarkevich, Begunov, Sachivko, Podstrelov, Ivanovich, Szoke, Kendish, Yaxshiboyev, Kabananga (Arxipov, 53).
BATE – Chichkan, Filipenko, Filipovich, Nastich, Filipovich, Villumsson, Yablonskiy, Stasevich, Dragun (Bessmertniy, 88), Nexaychik (Milich, 74), Skavish (Signevich, 82).
Ogohlantirishlar: Dragun (30), Xadarkevich (57), Yaxshiboyev (69), Skavish (81).