Superliganing 25-turida "Paxtakor" Toshkent derbisida "Lokomotiv" bilan bahs olib boradi.
Bellashuvni "Paxtakor"dan Hojiakbar Alijonov sariq kartochkalar bilan bog‘liq diskvalifikasiya tufayli o‘tkazib yuboradi. Jaloliddin Masharipov esa qizil kartochkadan olingan diskvalifikasiyani o‘tab bo‘ldi va maydonga tushishi mumkin. "Lokomotiv"da bunday yo‘qotish mavjud emas.
Chempionatlar tarixida jamoalar jami 33 bor to‘qnash kelishgan. Ularning 19tasida "Paxtakor" g‘alaba qozongan. 8 bellashuvda durang natija qayd etilib, 6 marta "Lokomotiv" ustun kelgan. Raqib darvozasiga 72 gol urgan "Sherlar" 31 to‘p o‘tkazib yuborishgan. Jamoamiz hisobida ikki marta 7tadan gol urilgan yirik natijalar bor. Shu yil birinchi davrada "Sherlar" 7:0, 2006 yil 7:1 hisobida muvaffaqiyatga erishgan. 2005 yilgi bellashuvda esa Anvar Soliyev raqib darvozasiga 5ta to‘p kiritgan! G‘alabalardan 6tasi yirik natija bilan erishilgan.
Safardagi o‘yinlarda ko‘rsatkichlar shunday ko‘rinish olgan: 8ta bahsda "Paxtakor" ustun kelib, 5 durang va 3 mag‘lubiyat qayd etgan. Mehmondagi eng yirik g‘alabamiz 6:1 natijasi 2005 yil kuzatilgan.
Gollar bo‘yicha ustunlik "Paxtakor" foydasiga - 39:19. O‘tgan mavsumda mehmonda golsiz durang qayd etilgan.
"Lokomotiv" va "Paxtakor" jamoalari o‘rtasidagi o‘yin 29 noyabr, yakshanba kuni soat 16:15da "Paxtakor" stadionida boshlanadi.
