«Andijon» bosh direktori Diyorbek Mullajonov klub matbuot xizmatiga bergan intervyusida jamoaning rejalari bilan o‘rtoqlashdi.

"Biz jamoani yil boshidan qabul qilmadik, eski tizimni to‘g‘rilash uchun oz bo‘lsa ham vaqt ketadi. Biz e’tiborimizni gap so‘zlarga qaratmoqchi emasmiz, bizga buning qizig‘i ham yo‘q. Bir chetdan turib gapirishni hamma biladi, bundaylar oldin ham bo‘lgan. Hattoki barcha bir-biriga dushman bo‘lib qolgan «gapchilar» sababli. Jamoada hammasi joyida, hech qanday muammo yo‘q. Faqatgina o‘zimiz maydonga tushib futbol o‘ynashimiz qoldi xolos.

Men avval ham aytganman, ko‘p vaqt ketsa ham biz kutgan jamoani yarata olamiz! To‘g‘risi, chetdan gapirish hamma biladi, ba’zi gaplar bir-biriga ham to‘g‘ri kelmaydi, ammo bizni barchani yonida yuzimiz yorug‘. Deyarli 99% muxlislar bizdan xursand, sababi ular bizga ishonishadi.

To‘g‘risini aytsam, ko‘p futbolchilar bizning jamoada o‘ynashni istamoqda, o‘zlari taklif bilan chiqishmoqda. Jamoamiz yomon bo‘lsa, futbolchilar nega bizning jamoada o‘ynashni istashmoqda? Chunki jamoada hech qanday muammo yo‘q. Ko‘p jamoalar oylab oylik maoshlarini olisha olmayapti, bizda bunday muammo yo‘q. Qandaydir savollar bo‘lsa ular uchun eshigimiz doim ochiq.

Takror aytaman. Ba’zilarning gaplari xalqimizning fikrini o‘zgartira olmaydi. Bizga ishongan muxlislar qo‘llab quvvatlashda davom etadi. Ba’zilar Pro Ligaga ravona bo‘lishimizni kutishayotgani ham sir emas.

Biz oxirigacha kurashamiz. Biz gap bilan emas, balkim amalda bajaradigan insonmiz!"