«Spartak» bosh murabbiyi Domeniko Tedesko jamoa yarim himoyachisi Oston O‘runov jamoani tark etishi mumkinligi haqidagi xabarga o‘z munosabatini bildirdi.

«O‘runovni yo‘qotish jamoa uchun qanchalik og‘riqli bo‘ladi? Men bu savolni tushunmayman. Oston — «Spartak» o‘yinchisi, uning klub bilan shartnomasi mavjud. U yosh va yaxshi futbolchi. Uning jamoamiz safida ekanidan xursandman.

Qaysidir jamoadan taklif tushgan bo‘lsa, bu hech narsani anglatmaydi. Uning "Spartak" safiga o‘tish tarixini yaxshi bilasiz. Shuningdek, u «Zenit»ga qarshi o‘yinda asosiy tarkibda maydonga tushganini eslasangiz kerak. Bu esa unga bo‘lgan ishonchimdan darak beradi. «Zenit»ga qarshi o‘yindan keyin u jarohat oldi va tiklandi. «Rostov»ga qarshi o‘yinda yana jarohatlandi. So‘nggi 2-3 haftadan buyon u to‘la kuch bilan ishlamoqda. Nihoyat bugun ozgina bo‘lsa ham maydonda harakat qildi. Biz unga ishonamiz. U yaxshi o‘yinchi. Ishlashda davom etishi va asosiy tarkibda o‘ynashga munosib ekanini isbotlashi kerak.

«Spartak»da o‘ynash oson emasligini barcha biladi. Men faqat bitta imkoniyat berish bilan cheklanib qolmayman. Aksincha, o‘yinchilarni ruhlantirishga, ularga motivasiya berishga harakat qilaman. O‘runovga esa jarohatlar xalal berdi. Umid qilaman, uning qora kunlari ortda qoldi», — dedi Tedesko.

Eslatib o‘tamiz, O‘runov avgust oyida 1 million yevro evaziga «Spartak» safiga o‘tgan edi. Joriy mavsumda "qizil-oqlar" safida 8ta o‘yinda maydonga tushib, bitta gol urdi.