«Andijon» jamoasining «Nasaf»ga qarshi uchrashuvidan so‘ng, maydon egalari ustozi Otabek G‘ulomxo‘jayev o‘z taassurotlarini quyidagicha izohladi:

"Keskin kurashlarga boy o‘yin bo‘ldi. Yigitlar maksimal darajada harakat qildi. «Nasaf»dek jamoaga qarshi 120 daqiqa himoyalanish qiyin. Baribir uchrashuv oxirida muvozanatni yo‘qotdik. Ko‘rinib turibdiki, yana standart vaziyatlar ustida ishlashimiz kerak. «Nasaf» yaqqol golga tortadigan imkoniyatlarni yaratgani yo‘q.

Pley-offda «Neftchi»ga qarshi o‘yin qanchalik muhim ekanini futbolchilarimiz bilib turibdi. Bu ushbu mavsumdagi oxirgi o‘yinimiz bo‘ladi. Shu bois maksimal darajada tayyorgarlik ko‘ramiz. Faqat o‘yinning sanasi bilan qaysi maydonda o‘tishi noma’lum. Bugungi o‘yin tarixda qoldi va so‘nggi bellashuvga tayyorlanamiz.

Jamoani qabul qilib olganimizda nafaqat hujumlarni yakuni, balki ko‘p narsa yo‘q edi. Himoyadan birinchi bo‘lib o‘yinni to‘g‘rilashga harakat qilyapmiz. Jamoamizda o‘zi 14 futbolchi bor xolos. Ko‘rdinglar, bugun Azizov bilan Toirovni asosiy tarkibda tushirdik. Ayrim futbolchilarimiz jarohat bilan maydonga tushishyapti. Agar zaxiramiz hamda vaqtimiz yetarli bo‘lganida bunday pala-partishliklar bo‘lmasdi. Qisqa muddat ichida maksimal darajada nimagadir erishishga harakat qilyapmiz.

«Neftchi»ga qarshi oxirgi o‘yinni o‘tkazganimizdan keyin rahbariyat bilan qolgan masalalar ko‘rib chiqiladi", — dedi G‘ulomxo‘jayev.