Kelayotgan 2021-yilgi futbol mavsumida o‘z oldiga yuksak maqsadlarni qo‘yishni niyat qilgan “Qo‘qon-1912” jamoasining murabbiylar shtabi seleksiya ishlarini qizg‘in tarzda olib borishmoqda.

Jamoaning yarim himoya hamda xujum chiziqlarini kuchaytirish maqsadida o‘tgan mavsumda o‘z jamoalari tarkibida yetakchilardan bo‘lgan futbolchilar jamoamizga taklif qilinmoqda. Shunday futbolchilardan biri yakunlangan mavsumni “Mash’al” tarkibida o‘tkazgan xujumchi Mo‘min Meliyev kelgusi mavsumni Qo‘qonda o‘tkazishi hal bo‘ldi. Meliyev “Mash’al” jamoasini pro-ligadan superligaga chiqishida hamda o‘tgan mavsumda superliga o‘yinlaridagi ishtirokida o‘zining munosib hissasini qo‘sha oldi.

Shuningdek “Andijon” jamoasining tayanch yarim himoyachisi , ko‘plab bahslarda Andijonliklarni sardor sifatida maydonga olib tushgan Farhod Bekmurodov ham kelgusi mavsumni “Qo‘qon-1912” jamoasida o‘tkazadigan bo‘ldi. Bekmurodovning qanday futbolchi ekanligini “Andijon” jamoasi o‘yinlarini kuzatib borgan muxlislar juda yaxshi bilishadi.

“Qo‘qon-1912” jamoasini esa tajribali yarim himoyachi Muzaffar Muzaffarov tark etdi. Muzaffarov jamoamiz bilan do‘stona xayrlashdi. Muzaffar Muzaffarovga superliganing bir nechta klublaridan takliflar bor. Muzaffarovga jamoamiz bilan o‘tkazgan mavsumi uchun minnatdorchilik bildiramiz. Biz Muzaffarjonga kelgusi faoliyatlarida omad tilaymiz !