Yuqoriga uchayotgan joyida negadir tepalikni yo‘qotib qulashni boshlagan «Chelsi»ning boshqaruvchilari vaziyatni o‘nglashga urinishmoqda.

Frenk Lempardni yosh murabbiylar orasida hamon zo‘ri deb hisoblaymanmi? Ha, shu fikrdaman. Qancha vaqt kerak? Shu mavsum oxirigacha. Jamoa 40 foizga yangilangan. Eksperimentlar davri tugamadi. Jarohatlar ham aralashgan. Bugun «Chelsi»da o‘ziga o‘qtalgan tanqidlar qurolini teskari qilib qo‘yish imkoni bor. Lekin, ancha harakat qilish zarur. Chunki raqib qudratli «Manchester Siti».

Gvardiola jamoasi endi tiklangan payt kutilmagan dushman bilan olishishga to‘g‘ri kelmoqda. «Siti» bazasiga koronavirus kirdi. Uoker va Jezusni taslim etdi. Qolgan 3 kishi sir saqlanmoqda. Shu sababli Pep bugun - ham «Chelsi», ham korona ta’siri bilan kurashadi. Tarkiblar chiqqanda, tabiiyki, o‘sha sir saqlanganlar kimligini bilib olamiz. Siz ham bilishni va jiddiy klublar jangini tomosha qilishni xohlasangiz 21:30da UzReport TV orqali uchrashishni taklif etaman. Uyog‘ini efirda gaplashamiz.

Davron Fayziyev.