«Yuventus» klubining sobiq futbolchisi Ilyos Zeytullayev o‘zbekistonlik hujumchi Eldor Shomurodovning "keksa sinyora"ga o‘tishi mumkinligi haqidagi xabarlarga o‘z munosabatini bildirdi.

— Buni eshitib juda xursand bo‘ldim. Chunki bu O‘zbekiston uchun muhim ahamiyatga ega. Top-klublar bizning futbolchilarga qiziqayotgani haqidagi xabar har doim ham paydo bo‘lavermaydi.

Eldorga qanchalik qiyin bo‘layotganini tasavvur qilyapman. Umuman olganda, har qanday xorijlik futbolchi uchun Italiya kelib, u yerda o‘rnashib qolishi qiyin vazifa.

Har qanday qiyinchilikka qaramay Shomurodovga mashg‘ulotda va har bir o‘yinda o‘zini ko‘rsatishini tilayman. Xudoga shukrlar bo‘lsinkim, hozir u bu ishni uddalayapti. So‘nggi bahslarda u juda yaxshi o‘yin namoyish etdi. Jismoniy va ruhiy jihatdan yaxshi formaga kirib oldi va u haqda yaxshi fikrlar gapirishyapti.

— Uning «Yuventus»ga o‘tish ehtimoli qay darajada?
— Men ekspert yoki insayder emasman, ammo o‘z tajribamdan kelib chiqib aytadigan bo‘lsam, hayotda hamma narsa bo‘lishi mumkin. «Yuventus» haqida gap chiqdimi, demak, klub haqiqatan unga qiziqqan. Axir klub hozirda Morataga o‘rinbosar qidirmoqda.

— Shomurodov A seriyaning top-klublari darajasiga chiqa olishi mumkinmi?
— Eldor — juda iqtidorli futbolchi. Agar u hozirgidek daraja ko‘rsatishda davom etsa, u top-klubda o‘ynash imkoniyatiga ega bo‘ladi. Hozirda esa «Jenoa»ning asosiy tarkibidan muqim o‘rin egallab, yaxshi futbol ko‘rsatishda davom etishi kerak. Nasib qilsa, «Lasio», «Milan», «Inter» yoki «Yuventus» variantlari ham paydo bo‘ladi.

— Aka-uka agentlar — Valerio va Gabriele Juffrida Shomurodovni «Jenoa»ga nisbatan kuchliroq klubga olib o‘tishlari mumkinmi?
— Shaxsiy fikrimcha, grandlar futbolchiga qiziqish bildirayotgani — bu Eldorning mehnati. Agar futbol o‘ynashni bilmasang, eng yaxshi agentlar ham senga yordam bera olmaydi. Axir, agentlar sening o‘rningga futbol o‘ynashmaydi.

Aka-uka agentlarni shaxsan men tanimayman. Ehtimol ular yaxshi mutaxassis bo‘lib, aql bilan ish tutayotgan bo‘lishlari mumkin, ammo barcha narsa o‘yinchining o‘ziga bog‘liq.