Italiya chempionatining 18-turi doirasida «Jenoa» klubi Bergamo shahrida «Atalanta» klubi mehmoni bo‘lib, muhim bir ochkoni qo‘lga kiritdi.

Genuyaliklar birinchi bo‘limda kuchli raqibga jiddiy qarshilik ko‘rsatishdi. Hattoki Shomurodov "Atalanta" darvozasini ishg‘ol qilish uchun 2ta imkoniyatga ega bo‘ldi. Strotmanning uzatmasidan keyin Eldor to‘pni ko‘kragi bilan qaytardi va jarima maydoni chizig‘i ustidan zarba yo‘lladi. To‘p shundoqqina ustun yonidan o‘tib ketdi.

Ikkinchi vaziyatda esa Shomurodov o‘zi hujumni boshladi va jarima maydoniga intildi. To‘p esa himoyachilar orqali uning yo‘liga keldi. O‘zbekistonlik futbolchining zarbasidan so‘ng to‘pni Gollini oyoqlari bilan qaytarib qoldi.

Gasperini jamoasi ikkinchi bo‘limda ustunlikni to‘laligicha o‘z tomonida ushlab turdi. "Jenoa" esa katta qiyinchilik evaziga durangni saqlab qoldi. Shomurodov bahs oxiriga qadar maydonda harakat qildi.  

Ushbu durangdan so‘ng "Jenoa" o‘z ochkolarini 15taga yetkazib, jadvalda 16-o‘ringa ko‘tarilib oldi. "Atalanta" esa 32 ochko bilan 6-pog‘onada qoldi.

Italiya A seriyasi, 18-tur
Atalanta – Jenoa 0:0 (0:0, 0:0)
Atalanta – Gollini, Gozens, Toloi, Gimshiti, Xatebur (Mele, 88), Ilichich (Lammers, 88), Froyler, Malinovskiy (Miranchuk, 66), de Ron, Palomino, Sapata (Muriel, 57).
Jenoa – Perin, Dzappakosta (Ongene, 80), Krishito, Masyello (Goldaniga, 56), Chiborra, Badel, Radovanovich, Strotman (Bexrami, 56), Zays (Lerager, 46), Pyasa (Pandev, 68), Shomurodov.
Ogohlantirishlar: Goldaniga (72), Dzappakosta (74), Gozens (83).