23 yanvar kuni start olgan «Hokim Kubogi» musobaqasi o‘zining hal qiluvchi bosqichiga chiqdi.

Guruh bosqichini ishonchli o‘tkazib, 7 ochko bilan chorak finalga birinchi o‘rinda chiqqan «Bunyodkor» ertaga yarim final yo‘llanmasi uchun Qirg‘izistonning «Nur Batken» klubiga qarshi maydonga chiqadi. Aytish kerakki, shu kunga qadar kuniga ikki mahaldan shug‘ullangan futbolchilarimizga bugun murabbiylar shtabi dam berdi. Ya’ni, «qaldirg‘ochlar» ertangi bahsga mashg‘ulotlarsiz tayyorgarlik ko‘rmoqda. Jamoamiz murabbiyi Marat Miftaxuddinovga bu borada murojaat qilganimizda quyidagicha javob oldik: - Farg‘onaga 23 yanvar kuni keldik va tushdan so‘ng mashg‘ulot o‘tkazdik. 24 yanvar kuni «Navbahor farm» bilan o‘ynadik. 2 va 3-tur oldidan ikki mahal shug‘ullandik. Ertalab trenajyor zalida, tushdan so‘ng maydonda. Avval ham aytganimdek, biz bu yerga nafaqat musobaqada qatnashish, balki mavsumga tayyorgarlik ko‘rish uchun ham kelganmiz. Shuning uchun reja asosida ishlayapmiz. Musobaqa deb mavsumga tayyorgarlik rejasini o‘zgartira olmaymiz. Kelganimizdan beri ikki mahaldan shug‘ullandik. Kechagi bahsdan so‘ng bugun futbolchilarga dam berishga qaror qildim. O‘ylashimcha, bu bizning foydamizga xizmat qiladi. Zero, o‘yinchilar odatda haftada bir kun dam olishadi va o‘z-o‘zidan ertangi bellashuvga charchoqlarsiz tayyor bo‘lishadi. Aslida bugun ham kamida bir mahal mashg‘ulot o‘tkazsak bo‘lardi, ammo bu futbolchilarning ertangi bahs oldidan charchab qolishlariga sabab bo‘lardi.

Xabar berganimizdek, taqvimga ko‘ra, «Nur Batken»ga qarshi o‘yinni «Neftchi» sport majmuasi o‘yingohida o‘tkazishimiz kerak edi. Ammo bugun tashkilotchilar vodiylik ishqibozlarga qulaylik yaratish maqsadida stadionlarda o‘zgarishni amalga oshirishdi. Guruh bosqichidagi bellashuvni «Neftchi» sport majmuasida o‘tkazgan «qaldirg‘ochlar» ertaga FarDUda ilk o‘yinida maydonga chiqadi. Xo‘sh, bu haqda murabbiy Marat Valentinovich nima deydi: - O‘ylashimcha, maydon o‘zgarishini unchalik ahamiyati yo‘q. Yurtimizda qish faslida deyarli barcha tabiiy maydonlarning holati bir xil bo‘ladi. Shuning uchun bu o‘zgarishga oddiy qaradim. Asosiysi, o‘z o‘yinimizni ko‘rsatish. «Nur Batken» ishtirokidagi uchrashuvni ko‘rmadim. Shu bois raqib haqida tasavvurim yo‘q. Aytganimdek, ertaga o‘z o‘yinimizni namoyish qilsak, g‘alaba biz tarafda bo‘ladi.