«Hokim Kubogi»ning chorak finalidan o‘rin olgan «Bunyodkor» - «Nur Batken» (5:0) uchrashuvidan keyin mehmonlar ustozi Rustam Ohunovning fikrlari bilan qiziqdik.
- «Nur Batken» birinchi marta bu kabi xalqaro musobaqada ishtirok etyapti. «Bunyodkor»ga qarshi o‘ynashimiz biz uchun yoqimli bo‘ldi. Osiyo Chempionlar ligasida to‘p suradigan, nomdor, tarkibida tajribali o‘yinchilari bor «Bunyodkor» va unga o‘xshagan jamoalar bilan o‘ynash katta maktab vazifasini bajarib beradi. Futbolchilar shunday raqiblarga qarshi bahslarda tajriba to‘playdi. Bizning darajamizdagi jamoalar yanada yaxshiroq o‘ynashni istaydi, shuning uchun bugungi o‘yin bizning foydamizga ishladi.
To‘g‘ri, hisob yirik ko‘rinish oldi. Aytganimdek, ilk bor bunday musobaqada qatnashdik. Tarkimizdagi futbolchilar ancha yosh, jamoa shakllanishni boshlaganiga ko‘p bo‘lgani yo‘q. Qolaversa, biz faqat milliy chempionatda ishtirok etamiz. «Bunyodkor»ni darajasi yuqori ekanligi sir emas. O‘ylashimcha, bugungi mag‘lubiyatimizga tajribasizlik sabab bo‘ldi. Futbolchilarning tajribasizligi hisob yirik ko‘rinish olishiga zamin yaratdi.
