29 yanvar kuni klublar sport direktorlari, yuristlari hamda futbol maktablari rahbarlari bilan uchrashuv bo‘lib o‘tdi. Unda 2021 yilgi mavsumdagi muhim o‘zgarishlar haqida gaplashib oldik. Klublar bo‘layotgan o‘zgarishlar qo‘l uchida emasligini, bu yo‘lda barchamiz birlashishimiz kerakligini his qilishlari biz uchun muhim.
Avval aytilganidek, Futbolchilar maqomi va o‘tishi bo‘yicha reglament tartibga keltirildi. Endilikda mazkur reglament muntazam ravishda yangilab boriladi. Shu hafta mazkur reglamentning elektron ko‘rinishi O‘zPFL saytiga joylanadi. Tez orada reglament nashr etiladi va klublarga tarqatiladi.
Shuningdek, 2021 yilgi mavsum uchun Musobaqalar o‘tkazish reglamenti ham tayyor bo‘lib ulgurgan. Mazkur reglament kelishish uchun O‘FAga taqdim etilgan. Bundan buyon Musobaqalar o‘tkazish reglamentini oktyabr oyidayoq tasdiqlash mexanizmi yo‘lga qo‘yiladi. Reglament tez orada O‘zPFL saytiga joylanadi hamda nashrga beriladi.
2021 yilgi mavsum taqvimi deyarli shakllantirildi. Shu hafta taqvim masalasida O‘FA bilan uchrashuv o‘tkazamiz. Tez orada O‘zPFL saytida yangi taqvim ham e’lon qilinadi.
Parallel ravishda Lisenziyalash reglamenti hamda Stadionlar to‘g‘risida nizom ustida ishlayapmiz. Tan olamiz, kechikyapmiz. Umid qilamanki, hamma narsa astalik bilan o‘z relsiga tushyapti. Keyinchalik har qanday o‘zgarishlar qat’iy reja asosida ketishiga erishishimiz kerak. 2020 yilgi epidemiologik vaziyat ko‘p narsalarni o‘zgartirib yubordi. Biz murakkab davrda vazifa qabul qilib oldik. Buni yaxshilikka deb qabul qildik, mehnat qilishda davom etamiz.
Futbol muxlislari bir jihatga e’tibor berishlarini istardik. Bugun nima qilayotgan bo‘lsak, 2022 yilgi mavsum uchun qilyapmiz. 2021 yilgi mavsum ichki chempionatda tub burilish davri bo‘ladi deb umid qilamiz. Xato va kamchiliklar o‘zimizniki, ularga albatta javob beramiz. Yutuqlarimiz esa barchamizniki. Unda minglab insonlarning katta mehnati yotibdi.
