«Roma» sport direktori Tyago Pinto ma’lumot berishicha, hujumchi Edin Jeko bundan keyin jamoa sardori hisoblanmaydi.

«Edin — kuchli futbolchi, katta tajribaga ega ajoyib professional, Fonseka esa loyihamiz yetakchisi hisoblanadi. U ulkan hajmdagi ishni amalga oshirdi. Biz o‘zaro ishonchni mustahkamlash uchun bir nechta uchrashuv o‘tkazdik. Uchrashuv yakunidan qoniqish hosil qildik. Endi esa e’tiborni umumiy maqsadlarga qaratishimiz kerak. Klub qoidalarga tayanib ish tutishi kerak. Shuning uchun Edin bundan keyin jamoa sardori hisoblanmaydi. Lekin barchamiz klub manfaati uchun ishlaymiz», — dedi Pinto "Football Italia"ga bergan intervyusida.

Eslatib o‘tamiz, bosniyalik futbolchi jamoa bosh murabbiyi Paulu Fonseka bilan mojaroga borgani uchun so‘nggi paytlarda alohida shug‘ullanayotgan edi. "Roma" qishki transfer paytida 34 yoshli futbolchini boshqa jamoaga berishni istadi, ammo bu reja amalga oshmadi. Jeko esa murabbiy bilan yarashdi va umumiy guruh mashg‘ulotlariga qaytdi.