«Bunyodkor» futbol klubi direktori Ulug‘bek Mirzayev jamoa muxlislari bilan uchrashdi.

«Bunyodkor» muxlislar uchun o‘ynaydi! Jamoa tashkil topgan kundan boshlab mazkur shior ostida faoliyat yuritmoqda. Shuning uchun «Bunyodkor» hech qachon o‘z muxlislarini e’tiborsiz qoldirmagan va albatta sodiq ishqibozlarimiz ham suyuklilarini yolg‘iz tashlab qo‘ymagan. «Bunyodkor»ning ilk kunidan boshlab yonma-yon bo‘lib kelgan muxlislarimiz bor ekan, biz shiorimizga sodiq qolaveramiz.

Kuni kecha klub direktori Ulug‘bek Mirzayev jamoa muxlislari bilan uchrashdi. Uchrashuvda muxlislar klubining bu yilgi rejalari, faoliyati muhokama qilindi. Shuningdek, muxlislar klubi a’zolarini qiynayotgan savollar, muammolar ko‘rib chiqildi. Ularni hal qilish bo‘yicha reja ishlab chiqilib, mas’ul xodimlarga vazifa qilib topshirildi. Tadbir yakunida muxlislar klubi a’zolari «Bunyodkor» stadioni muzeyiga tashrif buyurdi va esdalik uchun suratga tushildi.