Xabaringiz bor, bugun Namangan shahridagi “Markaziy” o‘yingohning zaxira maydonida “Navbahor” va “Andijon” jamoalari o‘rtasida o‘rtoqlik o‘yini o‘tkazildi (2:0).

Vodiy jamoalari o‘rtasidagi bahslar qanday uchrashuv bo‘lishidan qat’iy nazar, doimo murosasiz hamda keskin kurashlar ostida kechgan.

Bahsning birinchi bo‘limida har ikki jamoa a’zolari, shuningdek, murabbiylar o‘rtasida ham kelishmovchilik yuz berdi. O‘sha vaziyat xususida “Navbahor” bosh murabbiyi No‘’mon Hasanov quyidagicha fikr bildirdi:

- To‘g‘risi, ko‘pincha o‘yin paytida hissiyotlarni jilovlash oson bo‘lmaydi.“Andijon” bilan bo‘lgan bugungi uchrashuv paytida ham xuddi shunday holat kuzatildi va andijonliklar ustozi Otabek G‘ulomxo‘jayev bilan biroz tortishuv yuzaga keldi. Ammo tanaffus paytida Otabek G‘ulomxo‘jayevga uzrimni yetkazdim. O‘sha vaziyatda o‘zimni tutib turolmaganim uchun yana bir marotaba Otabek G‘ulomxo‘jayev, shuningdek, “Navbahor” va “Andijon” jamoalari muxlislaridan ham uzr so‘rayman.

“Navbahor” PFK matbuot xizmati.