«Yuventus» klubi sobiq prezidenti Jovanni Kobolli Jili jamoa yozda Krishtianu Ronalduni qo‘yib yuborishi kerakligini ta’kidladi.
«Ronaldu bilan shartnoma imzolanishi xato bo‘ldi. Bu aniq. Krishtianu «Yuventus»ga kelgan ilk kunda u bilan gaplashgandim. U buyuk chempion, ammo jamoa uchun haddan tashqari qimmatga tushmoqda. Endi hammasi «Yuventus»ga bog‘liq. Ular futbolchining bitta goli uchun million yevro to‘lashmoqda.
Men Pirloni ayblamayman. Anyelli uni lavozimga tayinlab, tavakkalchilikka qo‘l urdi. U Sarrini istamagandi, ammo Paratichi va Nedvedning talabi bilan Maurisio bilan shartnoma imzoladi. «Yuventus»ga qayta qurish jarayoni kerak.
Klub mavsum so‘ngida Ronalduni qo‘yib yuborishi kerak. Bu gap Paratichiga ham tegishli», – dedi Jili.