"Atalanta" – "Real" o‘yini 17-daqiqada buzilib qolgandi. Hakamning qarori bilan. Ikki jamoa tayyorlab kelgan uslubida o‘ynay olmagandi. “Real” bergamoliklarning personal pressingidan chiqib ketib, Isko orqali qarshi hujumlar uyushtirishni rejalashtirgan, Gasperini esa o‘yin davomida raqibni raqib tomonda bo‘g‘ishga qaror qilgandi. Teskari bo‘lib ketdi hammasi: mezbonlar bir yarim soat eng xushlamaydigan ishlarini qilishdi – himoyalanishdi faqat, Benzema va Ramossiz qolgan mehmonlar ikkinchi qavatda tuzukroq yakun topolmay charchashdi.

“Real” baxtiga shu kuni Bekxem rejimini yoqib olgan Mendining fantastik zarbasi muvaffaqiyatli chiqdi. 1:0 – har holda yaxshi yakun.

Lekin bugungi bahs butkul boshqacha kechadi. “Atalanta” gol urishi kerakligidan yanada hujumkorroq boshlaydi o‘yinni, “Real” esa... o‘tgan galgi qarshi hujumlarini kuchaytiradi. Endi Benzema ham safda.

O‘n yetti daqiqa qanday kechganligini bugun 90 daqiqa, balki 120 daqiqa ko‘rish imkoniyatimiz bor. Buning uchun Futbol TV kanalida 01:00da boshlanadigan o‘yinni kuzatishimiz kerak. Birgamiz. O‘tkazib yubormang!

Xayrulla Hamidov.