"Аталанта" – "Реал" ўйини 17-дақиқада бузилиб қолганди. Ҳакамнинг қарори билан. Икки жамоа тайёрлаб келган услубида ўйнай олмаганди. “Реал” бергамоликларнинг персонал прессингидан чиқиб кетиб, Иско орқали қарши ҳужумлар уюштиришни режалаштирган, Гасперини эса ўйин давомида рақибни рақиб томонда бўғишга қарор қилганди. Тескари бўлиб кетди ҳаммаси: мезбонлар бир ярим соат энг хушламайдиган ишларини қилишди – ҳимояланишди фақат, Бензема ва Рамоссиз қолган меҳмонлар иккинчи қаватда тузукроқ якун тополмай чарчашди.

“Реал” бахтига шу куни Бекхэм режимини ёқиб олган Мендининг фантастик зарбаси муваффақиятли чиқди. 1:0 – ҳар ҳолда яхши якун.

Лекин бугунги баҳс буткул бошқача кечади. “Аталанта” гол уриши кераклигидан янада ҳужумкорроқ бошлайди ўйинни, “Реал” эса... ўтган галги қарши ҳужумларини кучайтиради. Энди Бензема ҳам сафда.

Ўн етти дақиқа қандай кечганлигини бугун 90 дақиқа, балки 120 дақиқа кўриш имкониятимиз бор. Бунинг учун Футбол ТВ каналида 01:00да бошланадиган ўйинни кузатишимиз керак. Биргамиз. Ўтказиб юборманг!

Хайрулла Ҳамидов.