Tbilisi shahrida dzyudo bo‘yicha “Katta dubulg‘a” musobaqasining birinchi kun bellashuvlari o‘z yakuniga yetdi. Quvonarlisi, musobaqa startida jamoamiz 2 ta medal qo‘lga kiritishga muvaffaq bo‘ldi.

Dastlab -60 kg vazn toifasida Kemran Nurillayev finalda gruziyalik Temur Nodadzega qarshi tatamiga chiqdi. Bellashuvda hakamlar hamyurtimizni ta’qiqlangan usuldan foydalandi deya baholab, Nurillayevga texnik mag‘lubiyat yozildi.

-66 kg vaznda ham gruzin va o‘zbek polvonlari g‘oliblik uchun tatamiga chiqishdi. Sardor Nurillayev va Vaja Margvelashvili o‘rtasidagi qiziqarli bahsda hamyurtimiz uchi-mata usulini qoyilmaqom ijro etib, 20 soniyada g‘alabani o‘z foydasiga hal qildi.

Shu tariqa, jamoamiz aka-ukalarning muvaffaqiyatlari evaziga birinchi kun dasturini 1 ta oltin va 1 ta kumush medallari bilan yakunladi. O‘zbekiston Milliy olimpiya qo‘mitasi dzyudochilarimizni ushbu muvaffaqiyat bilan tabriklab, musobaqada ishtirok etadigan boshqa vakillarimizga ham omad tilab qoladi.