Farg‘onaning «Istiqlol» klubi Pro-Ligadagi ishtirokini davom ettira olmasligi haqida PFLga bildirishnoma bilan chiqdi. Bu haqda PFL bosh direktori vazifasini bajaruvchi Diyor Imomxo‘jayev ma’lum qildi.

«Istiqlol» futbol klubi jamoada yuzaga kelgan ichki vaziyat hamda iqtisodiy masalalar tufayli Pro-Liga musobaqasini davom ettira olmasligi yuzasidan xat berdi. Klub 2022 yilgi mavsumni Birinchi ligada o‘tkazish istagi bor ekani haqida ham yozgan.

Mazkur masala tegishli instansiya orqali tasdiqlangach, Reglamentning 8.9-bandiga asosan «Istiqlol» klubining joriy mavsumdagi o‘yinlari natijasi bekor qilinadi. Bungacha klub 4 ta uchrashuvda ishtirok etib, ularning barchasida imkoniyatni boy bergandi: «Xorazm» (1:2), «Dinamo» (1:2), «Neftchi» (0:2), «Oqtepa» (1:3).

«Istiqlol» 2020 yilgi mavsumda ham shunday xat bilan murojaat qilgan, sabab o‘rnida esa «Istiqlol» stadionidan foydalana olmayotganini ko‘rsatgandi. Keyinroq PFL va Farg‘ona viloyati hokimligi hamkorlikda bu masalani hal qilgandi.

«Istiqlol»ning rasman musobaqadan olinishi bo‘yicha tegishli tartibot amalga oshgach, bu haqda tashkilot rasmiy saytida rasman ma’lum qilinadi.

Eslatib o‘tamiz, «Istiqlol» Pro-Liga 2020 yilgi mavsumida 5-o‘rinni qo‘lga kiritgandi.