COPE xabariga ko‘ra, Real Madrid yangi kelishuv bo‘yicha Serxio Ramos bilan kelisha olmadi va nihoyat muzokaralarga chek qo‘ydi. Shu tariqa, joriy yilning 30 iyunidan so‘ng 35 yoshli futbolchi erkin agent maqomini oladi va yangi klub izlashni boshlashi mumkin bo‘ladi.
Ramos 2005 yildan beri "Real" sharafini himoya qilib keladi. 2020/2021 yilgi mavsumda himoyachi jamoa tarkibida jami 21ta o‘yin o‘tkazdi, to‘rtta gol urdi va bitta golli uzatmani amalga oshirdi. Oldinroq himoyachi ish haqini 10 foiz qisqartirish bilan ikki yillik shartnoma imzolamoqchi ekanligi haqida xabar berilgan edi, ammo klub faqat bir yillik shartnoma imzolashga tayyor ekanligini ma’lum qildi.
