AGMK bosh murabbiyi Mirjalol Qosimov "Andijon"ga qarshi bo‘lib o‘tgan bahs (3:2) borasida o‘z fikrini bildirib o‘tdi.

«Avvalambor yurtimizdagi barcha matbuot va OAV xodimlarini professional kasb bayramlari bilan tabriklayman. O‘yin qiziqarli va muxlislarga yoqadigan tomoshabop tarzda o‘tdi. Har ikkala jamoa hujumkor futbol ko‘rsatishga intildi. Yorqin va ochiq futbol ko‘rdik. Keskinlik yuqori va xavfli vaziyatlarga boy o‘yin bo‘ldi.

“Andijon” bugun mezbon maqomida mezbonlarga xos tarzda o‘ynadi va bizga yetarlicha qarshilik ko‘rsatdi. “Andijon”ning mazkur o‘yinini saqlanib qolsa, jamoa elitada qolishga qodir. Birinchi bo‘limda va ikkinchi taymda ham har ikkala jamoada gol urish uchun yetarlicha vaziyatlar yuzaga keldi. Ayniqsa jamoamiz o‘yin taqdirini avvalroq hal etib qo‘yishi ham mumkin edi. Ba’zi vaziyatlarda omad yuz o‘girgan bo‘lsa, ba’zan raqib darvozaboni jamoasini goldan qutqardi. Muhimi, kerakli g‘alabani qo‘lga kiritdik. G‘alaba bilan jamoamiz ishqibozlarini tabriklayman va bugungi o‘yin uchun futbolchilarimga rahmat aytaman».