PFL direktori vazifasini bajaruvchi Diyor Imomxo‘jayev futbol bo‘yicha Yevropa chempionatidagi jamoalar haqida, xususan Rossiya va Ukraina futbolidagi farq haqida fikr bildirdi.

"Ukraina terma jamoasining Yevroda ko‘rsatayotgani o‘yini balki dahshat emasdir, ammo ular chorak finalga qadar yetib bordi. Rossiya namoyish etgan futbol bilan solishtirganda, Ukrainaning o‘yini ustidan suv o‘girib ichsa arziydi.

Rossiya Yevroni sharmandalarcha tark etdi. Vaholanki, Rossiya futbol uchun sarflayotgan pul Yevropaning uncha-buncha mamlakatidan ko‘proq. Ammo ko‘ryapmizki, ichki chempionatga bunday katta chiqim qilmayotgan Ukraina, Shveysariya, Daniya, Chexiya kabi termalar nisbatan sog‘lom futbol ko‘rsata olyapti, ular yetishtirib berayotgan nomlar ham chakki emas. Kanalimiz o‘quvchilari Xorvatiya futboli haqidagi fikrlarimizni ham yaxshi biladi.

Ukraina chempionatida xuddi bizdagi kabi 14 klub to‘p suradi va shularning 12 tasini xususiy sektor moliyalashtiradi va ular byudjetdan pul olmaydi. Biz shu yo‘nalishda rivojlanishga harakat qilishimiz nisbatan to‘g‘riroq yo‘l. Davlat futbol akademiyalarini rivojlantirish va albatta futbol murabbiylarini o‘qitish tizimini moliyalashtirib, nisbatan yaxshiroq natijaga erishishi mumkin IMHO. Asosan futbol klublarining moliyalashtirilishi aslida qanday samara berishini bugungi futbol yaqqol ko‘rsatib turibdi. Biz tub burilish qilishdan cho‘chimasligimiz kerak, deydi PFL rahbari Imomxo‘jayev.