Avvalambor, bu eng uzoq davom etgan transfer jarayonlaridan biri deyishimiz mumkin. 15 yoshigacha “Uotford”da so‘ng ikki yil “Manchester Siti”da bo‘lib o‘sha vaqtda eng umidli o‘smirlardan biri sifatida tariflangan Sancho 2017 yil “Borussiya Dortmund” bilan shartnoma imzolaydi.

Birinchi mavsum o‘zini va Bundesligani his qilib olish uchun sarflangach, keyingisida u klubdagi eng yaxshi pleymekerga aylanadi – 17 ta golli uzatma (+12 ta gol). O‘sha mavsumdan so‘ng yarim yil ilgari MYUni qabul qilib olgan Ole Gunnar Sulsher unga qiziqish bildira boshlagandi.

Jeydonning Dortmunddagi faoliyati Pulishichning bosh murabbiy Favr bilan nizoga borishi bilan parallel kelgani haligacha angliyalikning omadi deb aytilsa-da, aslida u tabiiy ravishda ham o‘z o‘rnini topishga qodir ekani aniq edi.

U Germaniya chempionatida “eng yosh” old so‘zi bilan keluvchi bir necha rekordni yangiladi. Jumladan, 19ga to‘lib-to‘lmay chempionatning bir mavsumida 10 ta gol urgan eng yosh futbolchiga aylandi.

O‘rtacha ko‘rsatkichlar: Jeydon Sancho 90 daqiqada o‘rtacha 2,9 marotaba hal qiluvchi uzatma amalga oshiradi. Solishtirish uchun: Brunu Fernandesh – 2,7 va Lyuk Shou 2,4. U o‘rtacha har o‘yinda kamida bitta foydali kross uzatma muallifiga aylanadi. MYU vingerlarida bu raqam 0,2 ko‘rinishida ekan. So‘ngi 3 mavsumda Sancho 475 marotaba driblingda raqibdan o‘tishga uringan va 254 marotaba buni muvaffaqiyat bilan uddalagan. Ikki ko‘rsatkich bo‘yicha ham Sancho Bundesliga yetakchisidir. Kutilganidan ko‘proq gol urish borasida mutlaq yetakchi. So‘nggi uch mavsumda xG bo‘yicha kutilmalardan 12 ta ko‘proq gol urgan.

Eng e’tiborlisi Sky sport’ga ishonadigan bo‘lsak Jeydon Sancho so‘nggi 3 masvum top ligalarda stabil bo‘lgan 10 ta eng yuqori ko‘rsatkichli futbolchilar qatoriga kiradi.

Orif Tolipov.