O‘tgan mavsumda «PSJ»ning mag‘rurligi va ambisiyasiga jiddiy zarba berildi. Sayyoramizning eng qimmat ikki o‘yinchisi bilan parijliklar chempionlikni oddiy «Lill» ga boy berib qo‘yishdi. Shunga qaramay, «qizil-ko‘klar» Fransiya kubogi va superkubogida zafar quchishdi. Chempionlar Ligasida esa Maurisio Pochettino shogirdlari finalga bir qadam qolganida musobaqadan chiqib ketishdi. Agarda, «PSJ» mazkur musobaqada g‘olib bo‘lishganda, jamoaning kayfiyatiga yaxshi ta’sir ko‘rsatishi mumkin emas.
Klub rahbariyati muammoni taniqli usul - pul bilan hal qilishga qaror qildi. «PSJ» tarkibga yulduz futbolchilarni jalb qilishga faol tarzda kirishib ketdi va shuni ham ta’kidlash kerakki, parijliklar tarkibi tobora kuchayib bormoqda. Fransiyaning vise-chempionlari yaqin kelajakda Yevropa maydonida katta yutuqlarga erishishlari shart, aks holda ular hech qachon «pul sumkasi» prefiksidan xalos bo‘lmaydi. Keling, parijliklar kimlar bilan allaqachon shartnoma imzolagan va yaqin kunlarda o‘z tarkibiga qo‘shib olii mumkin bo‘lgan futbolchilar haqida batafsil ko‘rib chiqamiz.
«PSJ» kim bilan shartnoma imzolagan?
Jorjinyo Veynaldum
Yarim himoyachi Jorjinyo Veynaldum «PSJ»ning mavsumdagi birinchi yangi o‘yinchisiga aylandi. Gollandiyalik futbolchi «Liverpul»ni tark etib, parijliklar safiga tekinga o‘tdi. Ammo, futbolchi «ko‘k-qizillar»ga arzonga tushdi deb aytish mumkin emas. Yarim himoyachi Fransiya poytaxtida yiliga 10 million yevro maosh oladi. «PSJ» «Barselona» ham jiddiy tarzda qiziqish bildirgan futbolchi uchun kataloniyaliklarga qaraganda 2 barobar ko‘proq pul taklif qildi. Veynaldum oxir-oqibat parijliklarni tanladi. Futbolchi bu qarorini «PSJ»ning taklifi aniqroq ekanligi bilan izohladi. Tomonlar 3 yilga shartnoma imzolashdi. Shunday qilib, niderlandiyalik futbolchi Parij klubi futbolchsiga aylandi.
Ashraf Hakimi
Ashraf Hakimi «PSJ»ning yozda xarid qilgan ikkinchi futbolchisi hisoblanadi. OAV azaldan Marokash terma jamoasi a’zosini parijliklar bilan bog‘lab kelgan, ammo qandaydir sabablarga ko‘ra, «Inter» o‘zining eng yaxshi o‘yinchilaridan birini sotishiga ishonish qiyinroq edi. Biroq, «neradzurrilar» buni uddalay olishmadi. Klubning bosh direktori Juzeppe Marotta Xakimining sotilishini majburiy deb atadi. Milan klubi futbolchi uchun 60 million yevro olgan. Ushbu summa Milan klubiga moliyaviy muammolarni hal qilishda katta yordam bergani haqida aytilmoqda. O‘z navbatida «PSJ» Yevropaning eng yaxshi qanot himoyachilaridan biri bilan shartnoma imzolashni uddaladi.
Serxio Ramos
Serxio Ramos - «PSJ»ning yana bir yangi o‘yinchisi. Yevropaning eng yaxshi himoyachilaridan biri bo‘lgan ispan futbolchisi ham yangi mavsumni parijliklar safida boshlaydi. Shuningdek, Serxioning «ko‘k-qizillar» safiga erkin agent maqomida qo‘shilishi ham «PSJ» uchun ayi muddoa bo‘ldi. Parijliklar ispaniyalikka «Real» taklif qila olmaydigan narsani, ya’ni 2 yillik shartnoma taklif qilishdi. Qolaversa, futbolchining maoshi, avvalgi klubdagidan yuqori bo‘lishi ham mumkin. Aftidan, Presnel Kimpembe «PSJ»dagi asosiy markaziy himoyachi maqomini yo‘qotadi. Ramos rotasion futbolchi bo‘lish uchun Parijga kelmagan. Katta ehtimol bilan Serxio jamoa sardori bo‘lgan Markinyos bilan birgalikda asosiy markaziy himoyachi juftligini hosil qiladi.
Janluiji Donnarumma
Parijliklar yuqorida aytib o‘tilgan uchta yulduz futbolchi bilan cheklanib qolmaslikka qaror qilishdi. «Milan»ning sobiq darvozaboni, hozirgi kunda erkin agent hisoblangan Janluiji Donnarumma ham katta ehtimol bilan «PSJ»ning navbatdagi futbolchisiga aylanadi. Insayderlarning ma’lumotlariga ko‘ra, italiyalik Yevro-2020 musobaqasi paytida yangi klubining tibbiy ko‘rigidan o‘tgan va uning transferi musobaqa tugagandan so‘ng rasman e’lon qilinadi. Iyun oyida tomonlar 5 yillik shartnoma imzolashga kelishib olishdi, unga ko‘ra futbolchi bonuslardan tashqari yiliga 10 million yevro maosh oladi. Bu «Milan» taklif qilgan summadan 3 million yevro ko‘p. Italiyada Donnarummani unchalik qadrlashmadi. Parijda italiyalik kiperga judda qiyin bo‘ladi, chunki bu yerda uning asosiy raqibi Keylor Navas bo‘ladi.
«PSJ» yana kim bilan shartnoma imzolashi mumkin?
Krishtianu Ronaldu
OAV Ronalduni «Yuventus»ning Chempionlar Ligasidan ketganidan so‘ng, darhol «PSJ» bilan bog‘lay boshladi. Portugaliyalikning kelajagi haligacha noaniqligicha qolmoqda. Futbolchining «keksa sinyora» bilan shartnomasi tugashiga yana 1 yil bor, ammo u yaqin orada Turin klubini tark etishi mumkin. Mish-mishlarga ko‘ra, jamoa bosh murabbiyi Massimiliano Allegri Ronaldu bilan ishlashni istamayapti. Krishtianuda faoliyatini davom ettirish uchun bir nechta variantlar mavjud, ulardan biri — «PSJ». Portugaliyalik oldin Fransiyada o‘ynamagan va parijliklar bilan Chempionlar Ligasida g‘olib chiqish uchun yaxshi imkoniyatga ega bo‘ladi. Ammo bu holatda ko‘p narsa Kilian Mbappening kelajagi to‘g‘risidagi yakuniy qaror qabul qilinishga bog‘liq bo‘ladi.
Antuan Grizmann
So‘nggi paytlarda Grizmann ommaviy axborot vositalarida tez-tez tilga olinmoqda, ayniqsa, «Barselona» uni sotib yubormoqchi ekanligi haqida. Kataloniya klubiga o‘tgandan so‘ng, fransuz futbolchisi katta bosimni boshdan kechirdi va ushbu holat shu paytgacha susaymagan. Ispan klubi Antuanni sotishiga bir qancha sabablar bor. Birinchidan, Grizmanning jamoaga uzoq va qiyin moslashish jarayoni. Ikkinchidan esa «Barselona» rahbariyati Lionel Messi bilan yangi shartnoma uchun pul yig‘ish. «PSJ» Grizmanni Klian Mbappeni tark etsa, uning o‘rniga o‘rinbosar sifatida ko‘rib chiqmoqda. Ehtimol, uyga qaytish fransuz uchun yaxshi imkoniyat bo‘lishi mumkin. Mamlakatidagi eng yaxshi klublardan birida o‘ynab, o‘zini oldingidan ko‘proq erkin his qilishi mumkin bo‘ladi.
Robin Gosens
O‘tgan mavsum o‘rtalaridan boshlab top-klublar Gosensga jiddiy qiziqish bildira boshladilar. Futbolchi «Atalanta»da juda yaxshi o‘yin namoyish etmoqda. Chap qanot himoyachisi sifatida u ketma-ket A Seriyaning ikki mavsumida 17 ta gol + golli pas berdi. Nemis futbolchisi nafaqat gol urishda, balki uzatma berishda ham ancha faol. «PSJ» Gosens xizmatlariga qiziqish bildirishi ajablanarli emas. Hakimi bilan birgalikda ular daxshat himoya juftligiga aylanib, parijliklarning hujum salohiyatini o‘ta yuqori darajaga ko‘tarishi mumkin. Futbolchiga «Yuventus» va «Barselona» klublari ham qiziqish bildirmoqda, ammo parijliklar futbolchi uchun kurashda ustunlikka ega. Sababi - pul. Ayni paytda turinliklar ham, kataloniyaliklar ham bu borada muammolarga duch kelmoqdalar va bergamokliklar futbolchi uchun unchalik kam bo‘lmagan - 40 million yevroni talab qilmoqda.
Pol Pogba
Pogbaning «Manchester Yunayted»dagi kelajagi bir necha yildan buyon noaniq. Shu bilan birga, fransuz ingliz klubida haligacha faoliyatini davom ettirmoqda. Bir paytlar futbolchi Turinga yana qaytishi mumkinligi haqida xabarlar tarqalgandi, ammo «Yuventus»ning sobiq sport direktori Fabio Paratichi «keksa sinyora» yarim himoyachini qaytarish haqida hech qachon jiddiy o‘ylamaganligi haqida gapirdi. Ayni paytda, OAV xabarlariga ko‘ra, «PSJ» Pogba vakillari bilan muzokaralar olib bormoqda. «Mankunianliklar» futbolchining shartnomasi yakunlanishiga atigi 1 yil qolganiga qaramay, futbolchini qo‘yib yuborishga shoshilmayapti. Polga «PSJ» varianti qiziq tuyulmoqda, ammo parijliklarga nega beshinchi markaziy yarim himoyachi kerakligi umuman aniq emas. Shuhratparastlik va yulduzlarning nomlari yaxshi, ammo Nosir Al-Xelafi o‘zining «galaktikos»ini qidirishda ehtiyot bo‘lishi kerak. Katta pul ham jamoaga yordam berishi, ham zarar yetkazishi mumkin.
Jamshidjon Mahmudov tayyorladi.
