Futbol bo‘yicha Angliya terma jamoasi sardori Harri Keyn Italiyaga qarshi bo‘lib o‘tadigan Yevro-2020 finali haqida fikr bildirdi. Bu haqda UYEFA rasmiy sayti xabar qildi.
Hujumchi jamoadagilarning o‘ziga bo‘lgan ishonchi yuqori ekanini ta’kidladi.

«Rossiyadagi 2018 yilgi Jahon chempionati bizga yaxshigina dars bo‘lgan. O‘ylaymanki, biz bu darsni yaxshi o‘zlashtirganmiz. O‘zimizga bo‘lgan ishonchni his qilyapmiz. Bizda bunday o‘yinlar uchun yetarlicha mahorat bor», — dedi Keyn.

Eslatib o‘tamiz, Italiya va Angliya o‘rtasidagi Yevropa chempionatining final o‘yini 11 iyul kuni Toshkent vaqti bilan soat 23:59 da boshlanadi. Uchrashuv «UzReportTV» telekanali orqali translyasiya qilinadi.