Kecha O‘zbekiston Milliy olimpiya qo‘mitasida yurtimizda faoliyat olib borayotgan boks murabbiylari ishtirokida yig‘ilish tashkil etildi. 

Unda O‘zbekiston Milliy olimpiya qo‘mitasi raisi Rustam Shoabdurahmonov, O‘zbekiston Milliy olimpiya qo‘mitasi raisi o‘rinbosari va O‘zbekiston boks federasiyasi raisining birinchi o‘rinbosari Saken Polatov, O‘zbekiston boks federasiyasi mutasaddilari, terma jamoa murabbiylari va boks mutaxassislari ishtirok etishdi.

Yig‘ilish davomida Tokio Olimpiadasida qayd etilgan natijalar tahlil qilindi, yutuq va kamchiliklar muhokama qilindi.

So‘zga chiqqan tajribali mutaxassislar takliflarini, fikrlarini bildirishdi. Tajribali murabbiylar yuzaga keladigan muammolar, kamchiliklar haqida gapirishdi, mamlakatimizda musobaqalar tashkil etishni ko‘paytirish taklif etildi.

"Bir necha kun oldin o‘tkazilgan uchrashuvda Muhtaram yurtboshimiz tomonidan vazifalab belgilab berildi. Tokio Olimpiadasi biz uchun juda katta tajriba bo‘ldi. Sportda mayda narsaning o‘zi yo‘q - tibbiyot va psixologiya ham bunday vaqtlarda katta ahamiyatga ega. Biz sport orqali yurtimizga sog‘lom avlodni yetkazib berishimiz kerak. Barchaga rahmat aytmoqchiman", - dedi MOQ raisi yig‘ilish davomida.

Saken Polatov esa mutaxassislar fikri uchun federasiya eshigi doim ochiq ekanligini ta’kidlab o‘tdi.

"Biz uchun sizning fikrlaringiz juda muhim. Federasiyamiz eshigi siz uchun doimo ochiq. Biz federasiyada jamoatchilik va murabbiylar kengashi shakllantiramiz. Maqsad yo‘lida jipslashib ishlashimiz lozim. Fursatdan foydalanib, bir jamoada hamfikr bo‘lib faoliyat olib borayotgan murabbiylarimizga rahmat aytmoqchiman", - dedi Saken Polatov.

Shundan so‘ng terma jamoamiz bosh murabbiyi Marat Qurbonov tashkil etiladigan o‘quv-mashg‘ulot yig‘inlari haqida fikrlarini bildirdi. Rahmatjon Ro‘zioxunov esa hududlarda faoliyat olib borayotgan murabbiylar bilan yaqindan hamkor sifatida ishlash lozimligini alohida ta’kidlab o‘tdi.