Kecha Turkiya Superligasining bu yilgi mavsumiga start berildi. 1-tur doirasida, Giresun shahridagi Otaturk nomli stadionda chempionat debyutanti «Giresunspor» mamlakatning eng nomdor jamoasi – «Galatasaroy»ni qabul qildi.

O‘yinda tajribali mehmonlar 2:0 hisobida zafar quchishdi. Lekin ushbu o‘yin kiritilgan gollar emas, boshqa voqea bilan shov-shuv bo‘ldi.

Baxsning 63-daqiqasida «Galatasaroy»ning braziliyalik himoyachisi Markan o‘z jamoadoshi, turkiyalik yarim himoyachi Kerem Otaturko‘g‘lu bilan tortishib qoldi va kutilmaganda uning yuziga ketma-ket 2 marta musht tushirdi.

Uchrashuv bosh hakami voqeadan uzoqroq bo‘lgani sababli VAR ga murojaat qildi va maydonga qaytib braziliyalik futbolchiga qizil kartochka ko‘rsatdi. Turkiya Superligasi reglamentiga ko‘ra, Markan 5dan 10 o‘yingacha diskvalifikasiya qilinishi mumkin.