AGMKning Superliga 19-tur doirasidagi raqibi joriy mavsumni ancha barqaror o‘tkazayotgan Navoiyning "Qizilqum" jamoasi bo‘ladi.

Mirjalol Qosimov boshchiligidagi jamoamiz mazkur turda Navoiyga safar qiladi. Ushbu jamoalar o‘rtasidagi birinchi davrada o‘tgan bellashuvda sobiq futbolchilarimiz Erkin Baydullayev va Elguja Grigalashvililarning goli "Qizilqum"ga g‘alaba keltirgandi. Shu bois, AGMK Navoiyga faqat va faqat g‘alaba ilinjida safar qiladi hamda o‘zaro hisob-kitobni to‘g‘rilab qo‘yishga intiladi.

Ayni paytda olmaliqliklar 32 ochko to‘plagan holda musobaqa jadvalida 3-o‘rinni band etmoqda. Hamidjon Aktamov boshchiligidagi "Qizilqum" 26 ochko bilan jadvalda 6-o‘rinda bormoqda.

Ushbu qarama-qarshilikda jamoalar 29 bor to‘qnash kelgan. O‘zaro o‘yinlarda ustunlik jamoamiz tarafida. AGMK hisobida 13 g‘alaba, «Qizilqum»da esa bitta kam - 12 g‘alaba mavjud. Qolgan 4 o‘yinda esa g‘olib nomi aniqlanmagan. To‘plar nisbati ham AGMK foydasiga: 49-42.

O‘yin hakami etib qashqadaryolik yosh va iste’dodli hakam Firdavs Norsafarov tayinlangan.

Bu o‘yin Norsafarov uchun jamoamiz ishtirokidagi 5-uchrashuvga aylanadi. Bunga qadar Firdavs Norsafarov 2019 yili Liga Kubogi doirasida «Metallurg»ga qarshi bahsda ishlagan va unda jamoamiz g‘alabani tantana qilgandi. Shuningdek, ushbu hakam o‘tgan yili birinchi davrada hamda ikkinchi davrada AGMK va «Lokomotiv» o‘rtasidagi o‘zaro o‘yinlarni boshqargandi. O‘sha to‘qnashuvning dastlabki bahsida jamoamiz 3:1 hisobida g‘alaba qozongan bo‘lsa, javob bellashuvida «Loko»ning qo‘li baland kelgandi. Joriy mavsumdagi "Turon"ga qarshi safardagi o‘yinimizda ishlagan Norsafarov boshqargan bahsda jamoamiz g‘alabani tantana qilgandi.

Superliga, 19-tur.
20 sentyabr, dushanba.
"Qizilqum" – AGMK (19:00)
Navoiy shahri, "Markaziy" o‘yingoh.
Hakamlar: Firdavs Norsafarov, Olim Abduvosilov, Shavkat Rahmatov, Farruh Yansupov
Nazoratchi: Marat Ismoilov
Komissar: Aleksandr Davidenko