Pro liga 19-turining markaziy uchrashuvi G‘ijduvonda «Nurafshon» hamda «Dinamo» o‘rtasida kechdi.

Superliga yo‘llanmasi uchun kurash olib borayotgan Buxoro va Samarqand jamoalari o‘rtasidagi bahs “olti ochko”lik o‘yin edi. Stadionga muxlislar kirishiga ruxsat etilgach, G‘ijduvondagi o‘yinda Buxoro va Samarqanddan ham yuzlab muxlislar tashrif buyurgandi.

Murosasiz kurashlar ostida o‘tgan o‘yinning birinchi bo‘limida ikki tomonda ham hisobni ochish uchun imkoniyatlarga yaratilgan bo‘lsa-da, tabloda nollar porlab turardi. Samarqand jamoasi bo‘lim yakunida o‘yindagi ustunlikni tabloda ham aks ettirib qo‘yishi mumkin edi, ammo Sardor Eminovning zarbasi darvoza ustuniga tegib qaytdi.

Ikkinchi bo‘limning 77-daqiqasiga kelib, hisob ochildi. Mezbonlar himoyachisi Jasur O‘rinov jarima maydoni ichida Ro‘zimboy Ahmedovni qo‘pollik bilan yiqitdi. Jabrlanuvchining o‘zi penaltini golga aylantirdi – 0:1.

84-daqiqada esa Jasur Hasanovning uzatmasidan keyin Shohrux Abdurahmonov kuchli zarbasi bilan farqni ikkitaga oshirib, «Dinamo»ning g‘alabasiga munosib hissa qo‘shdi – 0:2.

Natijada, 2-o‘rindagi «Dinamo» 31 ochko bilan «Nurafshon»dan 7 ochkoga uzoqlashgan bo‘lsa, «Nurafshon» 24 ochko bilan 3-o‘rinda qoldi. Peshqadam «Neftchi» hisobida 34 ochko mavjud.
 
Pro liga. 19-tur. «A» guruhi
23 sentyabr, payshanba
«NURAFSHON» – «DINAMO» – 0:2
G‘ijduvon. “Navro‘z” stadioni. 192 tomoshabin.
Hakamlar: Viktor Serazitdinov, Islom Azimov, Sherzod A’zamov
Nazoratchi: Konstantin Smirnov
Komissar: Zohir Akramxonov
Gollar: Ro‘zimboy Ahmedov, 77 pen.(0:1), Shohruxbek Abdurahmonov, 84 (0:2)
«Nurafshon»: Sardor Qobuljonov, Mirjalol Jumayev, Bobur Qosimov (Shavkat Salomov, 46), Anvarjon Jo‘rayev, Davronbek Isoqov, San’at Shixov, Rustamjon Abduhamidov, Behro‘z Shodmonov, Sardorbek Izzatov, Marko Milich (Jasurbek O‘rinov, 31, Bekzod Sayidov, 83), Fayzullobek Jumanqo‘ziyev (Amirjon Safarov, 46, Tohir Malado‘stov, 77)
«Dinamo»: Aslonbek Ahrorov, Obid Jo‘raboyev, Jasur Hasanov, Muhammadqodir Hamraliyev, G‘olibjon Sariboyev, Temurbek Ismoilov, Islom Sharipov (Akmal Kozimov, 90), Shohruxbek Abdurahmonov (Oleg Marchuk, 87), Humoyun Sherbo‘tayev, Sardorbek Eminov (Siroj Meliyev, 87), Ro‘zimboy Ahmedov (Timur Usmonov, 80).
Ogohlantirishlar: Mirjalol Jumayev, 76, Anvarjon Jo‘rayev, 90+3 – Oleg Marchuk, 90+3.