O‘zbekiston Milliy paralimpiya qo‘mitasining yurtimizda imkoniyati cheklangan va nogironligi bo‘lgan shaxslarni sportga keng jalb etish, ular o‘rtasida ommaviy sportni rivojlantirish, jahon maydonlarida Vatanimizning sha’nini munosib himoya qiladigan matonatli sportchilarni tayyorlash borasidagi keng ko‘lamli sa’yi-harakatlar bilan bir qatorda xalqaro aloqalarni yangi bosqichga olib chiqish borasida amalga oshirilayotgan tizimli ishlar qo‘mitaning xalqaro maydondagi obro‘-e’tibori yuksilishiga xizmat qilmoqda.
Jumladan, joriy yilning 29 sentyabr - 2 oktyabr kunlari Xalqaro paralimpiya qo‘mitasi(IPC) prezidenti Endryu Parsons O‘zbekiston Milliy paralimpiya qo‘mitasi raisi Muxtorxon Tashxodjayevning taklifiga binoan rasmiy tashrif bilan yurtimizda bo‘ladi.
2017 yildan beri IPC prezidentligini bajarib kelayotgan braziliyalik Parsons janoblarining O‘zbekistonga ilk bor bo‘ladigan tarixiy rasmiy tashrifi doirasida bir qator uchrashuvlar, qisqa fursatda bunyod etilgan sport va madaniyat majmualari, mehmonxonalar hamda yaratilayotgan infratuzilmalar yurtimizning diqqatga sazovor joylari bilan yaqindan tanishish belgilangan.
30 sentyabr kuni Xalqaro paralimpiya qo‘mitasi(IPC) prezidenti Endryu Parsons ishtirokida Toshkentda «Yangi O‘zbekistonda – Paralimpiya xarakatini rivojlantirish» mavzusida kengaytirilgan konferensiya o‘tkazilishi rejalashtirilgan.
Tashrif Dasturining asosiy mavzularidan yana biri Xalkaro paralimpiya qo‘mitasi prezidenti Endryu Parsons bilan O‘zbekiston Respublikasi Bosh vaziri o‘rinbosari, Turizm va sport vaziri A.Abduhakimov va O‘zbekiston Milliy paralimpiya qo‘mitasi raisi M.Tashxodjayevning mamlakatimizda paralimpiya sport turlari bo‘yicha nufuzli musobaqalar o‘tkazish hamda Xalqaro paralimpiya qo‘mitasi bilan O‘zbekiston Milliy paralimpiya qo‘mitasining hamkorlik masalalari borasida rasmiy uchrashuvi o‘tkazilishi belgilangan.
