Coca Cola O‘zbekiston kubogi chorak final bosqichidan o‘rin olgan “Bunyodkor” – “Surxon” (2:1) uchrashuvidan so‘ng mehmonlar bosh murabbiyi Bahrom Haydarov o‘z fikrlarini bildirib o‘tdi.

- Har doim kubok o‘yinlari shu kabi shiddat bilan o‘tadi. Keyingi bosqich yo‘llanmasi bitta o‘yin orqali hal bo‘lishi o‘ziga yarasha bosim yuklaydi. “Bunyodkor”ga qarshi safardagi o‘yin qiyin o‘tishini bilardik. Bugun ishqibozlarga yoqadigan tomoshabop bellashuv bo‘ldi. Birinchi bo‘limda gol o‘tkazmaslikka harakat qilgandik. Afsuski, xato evaziga mezbonlar darvozamizga to‘p kiritishdi. Ikkinchi bo‘limda oldinga chiqishga majbur bo‘ldik. Ikkinchi taymda birinchisidan ko‘ra vaziyatlarimiz ko‘proq bo‘ldi. Hatto hisobni tenglashtirishimiz ham mumkin edi. “Bunyodkor” jamoasini yarim final yo‘llanmasi bilan tabriklayman! Kubok bahsi bir o‘yindan iborat. Agar chempionat doirasida bo‘lsa, 1 ochko uchun ham o‘ynaladigan uchrashuvlar bo‘ladi. Hozir bizga chempionatda har bir ochko suv va havodek zarur. Kubok o‘yinida hisobga qarab o‘ynadik. Zaxira vakillarimiz ham o‘yinni kuchaytirdi. Lutfulla To‘rayev bugun o‘ynamagani nafaqat yarim himoyamizga, balki butun jamoamizga yengillik berdi. Baribir ushbu mavsumda Lutfulla To‘rayev o‘yinni boshqaryapti, uni o‘ynovchi murabbiy sifatida ko‘rsatsa to‘g‘ri bo‘ladi. Bu kabi futbolchilar jamoada murabbiylarga yaqindan yordam beradi.