Coca Cola Ўзбекистон кубоги чорак финал босқичидан ўрин олган “Бунёдкор” – “Сурхон” (2:1) учрашувидан сўнг меҳмонлар бош мураббийи Баҳром Ҳайдаров ўз фикрларини билдириб ўтди.

- Ҳар доим кубок ўйинлари шу каби шиддат билан ўтади. Кейинги босқич йўлланмаси битта ўйин орқали ҳал бўлиши ўзига яраша босим юклайди. “Бунёдкор”га қарши сафардаги ўйин қийин ўтишини билардик. Бугун ишқибозларга ёқадиган томошабоп беллашув бўлди. Биринчи бўлимда гол ўтказмасликка ҳаракат қилгандик. Афсуски, хато эвазига мезбонлар дарвозамизга тўп киритишди. Иккинчи бўлимда олдинга чиқишга мажбур бўлдик. Иккинчи таймда биринчисидан кўра вазиятларимиз кўпроқ бўлди. Ҳатто ҳисобни тенглаштиришимиз ҳам мумкин эди. “Бунёдкор” жамоасини ярим финал йўлланмаси билан табриклайман! Кубок баҳси бир ўйиндан иборат. Агар чемпионат доирасида бўлса, 1 очко учун ҳам ўйналадиган учрашувлар бўлади. Ҳозир бизга чемпионатда ҳар бир очко сув ва ҳаводек зарур. Кубок ўйинида ҳисобга қараб ўйнадик. Захира вакилларимиз ҳам ўйинни кучайтирди. Лутфулла Тўраев бугун ўйнамагани нафақат ярим ҳимоямизга, балки бутун жамоамизга енгиллик берди. Барибир ушбу мавсумда Лутфулла Тўраев ўйинни бошқаряпти, уни ўйновчи мураббий сифатида кўрсатса тўғри бўлади. Бу каби футболчилар жамоада мураббийларга яқиндан ёрдам беради.