Xavi Ernandes “Barselona” bosh murabbiyi lavozimini egallaganidan so‘ng darhol Kataloniya klubi an’analarini davom ettirdi. Ispaniyalik mutaxassis o‘zining debyut uchrashuvida “Espanyol”ga qarshi Kataloniya derbisida g‘alaba qozondi.
Shu tariqa, yangi murabbiylar shtabi qariyb besh yildan beri davom etayotgan seriyani davom ettirishga muvaffaq bo‘ldi – “ko‘k anorranglilar” “Kamp Nou”dagi asosiy raqibi ustidan ketma-ket 14 uchrashuvda g‘alaba qozonishdi. Qolaversa, ushbu uchrashuvlarning 11 tasida “Barselona” o‘z darvozasi dahlsizligini saqlagan.
Qo‘lga kiritgan uch ochko Xavi shogirdlariga turnir jadvalidagi o‘rnini biroz yaxshilashga va Ispaniya chempionati peshqadamiga yaqinlashib, oltinchi pog‘onaga ko‘tarilishlariga yordam berdi.
